Գիտնականներ. քաղցրակերության հիմքում գենետիկան է

ԵՐԵՎԱՆ, 3 օգոստոսի–Sputnik. Սուրճի մեջ սովորաբար հինգ գդալ շաքարավազ օգտագործող և օրական մեկ սալիկ շոկոլադ ուտող մարդիկ հաշտվել են քաղցրակերի «կարգավիճակի» հետ։ Միաժամանակ նրանք չեն կարողանում սահմանափակել քաղցր ուտելու սովորությունը։ Գիտնականները կարծում են, որ խնդիրը գեներում է, գրում է vokrugsveta.ru-ն` հղում անելով  ScienceDaily –ին։
 
Քաղցր համը տարբերելու ունակությունը ֆիքսված է գեներում։ Միաժամանակ կարևոր չէ, թե այն պատրաստված է բնական շաքարից, թե շաքարի փոխարինիչից։ Իրենց հետազոտությունում նման արդյունքների են եկել ԱՄՆ–ի Մոնելի քիմիական հետազոտությունների կենտրոնի գիտնականներն ու նրանց հետ համագործակցող կազմակերպությունները։
 
Աշխատանքի հեղինակ, գենետիկ Դանիել Ռիդի խոսքով` «հաճախ համարում են, որ մեծ քանակությամբ քաղցր ուտելը մարդկային թուլություն է», ինչը սխալ է։ «Դա նման է այն երևույթի, երբ վատ լսողություն ունեցող մարդիկ ռադիոյի ձայնը բարձրացնում են` այն ավելի լավ լսելու համար, նույն կերպ քաղցր համը վատ տարբերող մարդիկ լրացուցիչ գդալ շաքարավազ են ավելացնում սուրճի մեջ», – նշում է գիտնականը։

Հետազոտությանը մասնակցել են 243 զույգ միաբջիջ երկվորյակներ (նման մարդիկ գենետիկորեն նույնական են), 452 զույգ երկբջիջ երկվորյակներ (նրանք ունեն մոտ 50 տոկոս միանման գեներ) և 511 հասարակ մարդիկ։ Երկվորյակների հետազոտությունը թույլ է տվել գնահատել քաղցր համի ընկալման վրա գեների ազդեցության աստիճանը։
 
Փորձարկվողներից յուրաքանչյուրը փորձել է, իսկ հետո գնահատել չորս տեսակի քաղցրացնող նյութեր, որոնցից երկուսը բնական են եղել` գլյուկոզա և ֆրուկտոզա, երկուսը` սինթետիկ` ասպարտամ (Е951 սննդային հավելում) և NHDC քաղցրացնող նյութը, որը ստացվում է ցիտրուսային բույսերից։

 Ըստ ստացված տվյալների` գեները որոշում են մարդկանց կողմից քաղցր համի ընկալման հարցում տարբերությունների 30 տոկոսը։ Հետազոտությունը ցույց  են տվել, որ նրանք, ովքեր բնական քաղցրացնող նյութերը թույլ արտահայտված են ընկալում, զգում են նաև շաքարը փոխարինող նյութերի համը։ Գիտնականները շարունակում են ուսումնասիրել կենսաբանական մեխանիզմը, որն ընկած է մարդկանց կողմից տարբեր տիպի քաղցր նյութերի մոլեկուլների ճանաչման հիմքում։

Հետազոտության արդյունքում բացահայտվել է նաև, որ շրջապատող միջավայրը ևս փոքր–ինչ ազդում է քաղցր համի ընկալման վրա։ Այսպես, այն երկվորյակները, ովքեր փոքր տարիքում սնվել են, այսպես կոչված, հանրային սնունդով` շաքարի բարձր պարունակությամբ, պակաս զգայուն են քաղցր համի նկատմամբ։

Գիտնականները հույս ունեն, որ քաղցր համի ընկալման գործում գենետիկ տարբերությունները կստիպեն արտադրողներին նվազեցնել արտադրվող ապրանքների շաքարի պարունակությունը։ Գիտնականները համոզված են, որ շատ մարդիկ կցանկանային ավելի քիչ քաղցր օգտագործել։