Համահայկական խաղերի շրջանակում Արտաշատում անցկացվել են թեթև ատլետիկայի մրցումները

ԵՐԵՎԱՆ, 8  օգոստոսի– Sputnik. Համահայկական խաղերի շրջանակում նախօրեին Արտաշատում անցկացվել են թեթև ատլետիկայի մրցումները։ Ինչպես «Sputnik-Արմենիա»–ին տեղեկացրեց մրցումների գլխավոր մրցավար Տիգրան Սիմոնյանը, մրցումներին մասնակցել են աշխարհի 32 երկրներ ներկայացնող 350 մարզիկներ։

Նիզակի նետման մրցումներում առաջին տեղը զբաղեցրել է գյումրեցի Մելիք Ջանոյանը` 64,82 մետր արդյունքով, երկրորդ տեղում կրկին գյումրեցի է՝ Ալբերտ Մարտիրոսյանը (58,83 մ), երրորդն արտաշատցի Արշակ Մխիթարյանն է (41,65 մ)։

Հեռացատկում կանանց շրջանում առաջին տեղը զբաղեցրեց գյումրեցի Ամալյա Շարոյանը` 6,21 մետր արդյունքով, երկրորդ տեղում է երևանցի Սաթենիկ Հովհաննիսյանը (6,11 մ), երրորդը Կապանը ներկայացնող Իրինա Գրիգորյանն է (5,23 մ)։

100 մետր վազքի մրցումներում առաջինը եզրագծին հասավ Էրիկ Զիլբերշտեյնը (Ախալցխա, Վրաստան)` 10,7 վայրկյան արդյունքով, երկրորդ տեղը զբաղեցրեց Լյուդվիգ Զիլբերշտեյնը (Ախալցխա, 10,8 վայրկյան), երրորդը երևանցի Ռազմիկ Մկրտչյանն է (Երևան, 10,9 վայրկյան)։


Համահայկական ամառային վեցերորդ խաղերն անցկացվում են Հայաստանում և ԼՂՀ–ում օգոստոսի 3–13–ը։ Խաղերին մասնակցում են աշխարհի 36 երկրների տարբեր քաղաքներից ժամանած ավելի քան 6,35 հազար հայ մարզիկներ։