ԵՐԵՎԱՆ, 11 օգոստոսի – Sputnik. Փրկարարները հայտնաբերել և ջրից դուրս են բերել Մոսկվայի մերձակայքում շաբաթ երեկոյան Իստրինսկի ջրամբարի մոտակայքում տեղի ունեցած հիդրոինքնաթիռի և ուղղաթիռի բախումից տուժած իններորդ զոհի մարմինը, հայտնել է ՌԴ ՔԿ–ի պաշտոնական ներկայացուցիչ Վլադիմիր Մարկինը։
Մասնավոր Cessna հիդրոինքնաթիռը և Robinson ուղղաթիռը բախումից հետո խորտակվել են Իստրինսկի ջրամբարի ափից 500 մետր հեռավորության վրա։
Օդանավում, բացի օդաչուից գտնվել են ևս չորս մարդ` Հայաստանի քաղաքացի, այդ թվում` երկու երեխա։
Ավիավթարի զոհ են դարձել ինը մարդ, մյուս ութ տուժածների մարմինները դուրս են բերվել ջրից նախօրեին։
«Ներկա պահին հայտնաբերվել և ջրից դուրս է բերվել իններորդ զոհի մարմինը», – ասել է ՔԿ–ի ներկայացուցիչը։
Հիդրոինքնաթիռն ու ուղղաթիռն արդեն դուրս են հանել ջրից, դրանց մասերն ուսումնասիրում են Միջպետական ավիացիոն կոմիտեի ներկայացուցիչները։ Որպես ողբերգության հիմնական վարկած քննիչներն առաջ են քաշում օդաչուների սխալը։
«Նույնիսկ եթե մեր մեծ մարդատար օդանավերի կործանման քրեական գործերում պարզվում է, որ դրանք վարել են կեղծ արտոնագրերով օդաչուները, կարող եք պատկերացնել, ովքեր են այսօր շահագործում այդ փոքր ինքնաթիռներն ու ուղղաթիռները, ինչպիսին է օդաչուների պատրաստվածությունը», – ավելացրել է Մարկինը։
Իստրինսկի ջրամբարի մոտակայքում տեղի ունեցած ավիավթարի փաստով հարուցվել է երկու քրեական գործը, մեկը` օդային տրանսպորտի երթևեկության անվտանգության կանոնները խախտելու համար, որը հանգեցրել է երկու և ավել թվով մարդկանց մահվան, իսկ երկրորդը` անվտանգության պահանջներին չհամապատասխանող մատուցած ծառայությունների համար։
ՔԿ–ն հայտնել է ինքնաթիռի կործանման իններորդ զոհի մարմնի հայտնաբերման մասին
Բաժանորդագրվել
Իստրինսկի ջրամբարի մոտակայքում տեղի ունեցած հիդրոինքնաթիռի և ուղղաթիռի բախումից տուժած իններորդ զոհի մարմինը մոտ երկու օր որոնելուց հետո գտել են երկուշաբթի երեկոյան
