ԵՐԵՎԱՆ, 11 օգոստոսի–Sputnik. Հայտնի էքստրասենս Անի Մաջնունյանի սպանության մեջ կասկածվող Մուշեղ Մխիթարյանի ծանոթուհին ականատես է եղել մի տեսարանի, թե ինչպես է Անի Մաջնունյանը գետնին ընկած խռխռում, իսկ Մուշեղը գումարն ու ոսկեղենն է փնտրում, հաղորդում է «Ժողովուրդ» թերթը։
Վեցերորդ զգայարան» հայտնի շոուի մասնակից, 55–ամյա Անի Մաջնունյանին օգոստոսի 5–ին սեփական բնակարանում սպանված էին գտել։ Մաջնունյանի մարմնի վրա դատաբժշկական փորձագետները գտել էին 58 վնասվածք։
Սպանված կնոջ բնակարանը տակնուվրա էր արված, տարբեր կողմեր էին նետված կահույքի դարակները, հագուստը և այլ իրեր թափթփված էին սենյակով մեկ:
Թերթի տեղեկություններով՝ Անի Մաջնունյանի սպանության մեջ մեղադրվող Մուշեղ Մխիթարյանը, մինչ Անիի բնակարան բարձրանալը և սպանելը, շենքի բակում շանտաժի է ենթարկել իր ծանոթուհուն:
Ըստ տեղեկությունների՝ Մուշեղն իմացել է, որ Անին գումար ունի իր մոտ և այդ նպատակով իր ծանոթ աղջկա հետ գնացել է Անիի տուն:
Սակայն, թերթի տեղեկություններով, աղջիկը հրաժարվել է բարձրանալ Անիի տուն, որից հետո Մուշեղը շենքի բակում սկսել է շանտաժի ենթարկել աղջկան, բայց ի վերջո նա միայնակ է բարձրացել, իսկ նրա ծանոթուհին սպասել է շենքի բակում:
«Բայց երբ Մուշեղի ծանոթուհին տեսել է, որ նա շատ է ուշանում, բարձրացել է Անիի բնակարան և ականտես եղել մի տեսարանի, թե ինչպես է Անի Մաջնունյանը գետնին ընկած խռխռում, իսկ Մուշեղը, ըստ էության, գումարն ու ոսկեղենն է փնտրում»,- գրում է թերթը:
Մաջնունյանի սպանության փաստի առթիվ Երևանի Աջափնյակ և Դավիթաշեն վարչական շրջանների քննչական բաժնում հարուցվել է քրեական գործ ՀՀ ՔՕ 104–րդ հոդվածի երկրորդ մասի ութերորդ կետի հատկանիշներով (սպանություն` զուգորդված թալանով)։
