Հայաստանում մեկնարկում է 2015-2016թթ.–ի սիրողական որսաշրջանը

ԵՐԵՎԱՆ, 14 օգոստոսի – Sputnik.  Հայաստանի տարածքում մեկնարկում է սիրողական որսաշրջանը, հայտնում է Հայաստանի բնապահպանության նախարարության մամուլի ծառայությունը։ Համապատասխան հրամանն օգոստոսի 13-ին ստորագրել է գերատեսչության ղեկավար Արամայիս Գրիգորյանը:

Ըստ հաղորդագրության, հրամանում նաև նշվում են Հայաստանի Հանրապետության տարածքում 2015-2016 թվականների սիրողական որսի համար որսի կենդանիների թույլատրելի չափաքանակներն ու որսի ժամկետները:

Փաստաթղթում նշվում է, որ Հայաստանի Հանրապետության տարածքում (բացառությամբ բնության հատուկ պահպանվող տարածքների) թույլատրվում է հետևյալ որսատեսակների սիրողական որսը` լոր — 2015 թվականի օգոստոսի 23-ից հոկտեմբերի 31-ը (10 հատից ոչ ավելի յուրաքանչյուր որսի ընթացքում), աղավնիներ (թխակապույտ և անտառային, սովորական տատրակ) — 2015 թվականի օգոստոսի 23-ից 2016 թվականի հունվարի 31-ը (5 հատից ոչ ավելի յուրաքանչյուր որսի ընթացքում), քարակաքավ — 2015 թվականի նոյեմբերի 1-ից  դեկտեմբերի 31-ը (5 հատից ոչ ավելի յուրաքանչյուր որսի ընթացքում), կտցարներ (բացառությամբ Հայաստանի Հանրապետության Կարմիր գրքում գրանցվածների) — 2015 թվականի օգոստոսի 23-ից դեկտեմբերի 31-ը (5 հատից ոչ ավելի յուրաքանչյուր որսի ընթացքում), արտույտներ (դաշտային, տափաստանային) — 2015 թվականի սեպտեմբերի 10-ից հոկտեմբերի 31-ը (5 հատից ոչ ավելի յուրաքանչյուր որսի ընթացքում), սարյակ (սովորական) — 2015 թվականի օգոստոսի 23-ից հոկտեմբերի 31-ը (10 հատից ոչ ավելի յուրաքանչյուր որսի ընթացքում), կեռնեխներ (սև կեռնեխ, սինակեռնեխ) — 2015 թվականի օգոստոսի 23-ից դեկտեմբերի 31-ը (5 հատից ոչ ավելի յուրաքանչյուր որսի ընթացքում)։

Որսի համար թույլատրելի են նաև ջրլող թռչունները` բադեր (կռնչան բադ, կարմրագլուխ սուզաբադ, սուլող և ճքճքան մրտիմներ) և ջրհովվիկներ (փառփար, եղեգնահավ) —2015 թվականի սեպտեմբերի 15-ից  2016 թվականի փետրվարի 29-ը (2 հատ բադից և 2 հատ ջրհովվիկից ոչ ավելի յուրաքանչյուր որսի ընթացքում)։

2015-2016 թվականների որսաշրջանի ընթացքում վերոնշյալ կենդանատեսակների համար որսի թույլտվություն ունեցող անձինք կարող են իրականացնել նաև մոխրագույն ագռավի, կաչաղակի, գայլի և շնագայլի որս: