Սարգսյանը ցավակցություն է հայտնել Իրաքի նախագահին Բաղդադի ահաբեկչության կապակցությամբ

ԵՐԵՎԱՆ, 14 օգոստոսի – Sputnik. Հայաստանի նախագահ Սերժ Սարգսյանը ցավակցական հեռագիր է հղել Իրաքի Հանրապետության նախագահ Մուհամմադ Ֆուադ Մաասումին՝ Բաղդադում տեղի ունեցած սահմռկեցուցիչ ահաբեկչական գործողության կապակցությամբ, որի հետևանքով զոհվել և վիրավորվել են բազմաթիվ անմեղ քաղաքացիներ։

Ավելի վաղ հայտնել էին, որ Բաղդադում ականապատ բեռնատարի պայթյունի զոհ է դարձել 60 մարդ, 200-ը վնասվածքներ են ստացել։ Պայթյունի պատասխանատվությունն իր վրա է վերցրել «Իսլամական պետություն» խմբավորումը։

Սարգսյանը խստորեն դատապարտել է ահաբեկչության ցանկացած դրսևորում՝ խորին ցավակցություն հայտնելով նախագահին և Իրաքի եղբայրական ժողովրդին։

«Զոհվածների հարազատներին մաղթում ենք տոկունություն և ոգու արիություն, իսկ վիրավորներին՝ շուտափույթ ապաքինում», — ասված է ՀՀ Նախագահի ցավակցական հեռագրում։

Իրաքում իրավիճակն անկայուն է, որի գլխավոր պատճառը «Իսլամական պետություն» արմատական խմբավորման գրոհայինների լայնամասշտաբ գրոհն է։ Իսկ այս խմբավորումը կապեր ունի «Ալ Քայիդայի» հետ։

ԻՊ–ն մեծ թափ առավ Սիրիայի տարածքում ծավալած գործողությունների ժամանակ, երբ պայքարում էր կառավարական ուժերի դեմ։ Այսօր «Իսլամական պետությունը»  ամենադաժան խմբավորումներից մեկի համբավն ունի։ Գրոհայինների գործողությունների հետևանքով զոհվել է մի քանի հազար խաղաղ բնակիչ, հարյուր հազարավոր մարդիկ փախստական են դարձել, ևս մի քանի մարդու պատանդ են վերցրել։