ՀՀ քաղաքացուն ձերբակալել են Վրաստան զենք տեղափոխելու փորձ կատարելիս

ԵՐԵՎԱՆ, 18 օգոստոսի– Sputnik. «Սադախլո» հսկիչ–անցակետում Հայաստանի քաղաքացու ավտոմեքենայում «Վալտեր» տեսակի հրազեն և տասը փամփուշտներ են հայտնաբերել, հայտնում է Վրաստանի ֆինանսների նախարարության մամուլի ծառայությունը։

Զենքն առգրավել են Վրաստանի ՆԳՆ–ի և Եկամուտների ծառայության աշխատակիցները ՀՀ քաղաքացի Ֆրունզիկ Ա.–ի մեքենան խուզարկելու ժամանակ։

«Քննությունը պարզել է, որ մեղադրյալը «Սադախլո» հսկիչ–անցակետով Հայաստանի Հանրապետությունից Վրաստան է փորձել տեղափոխել «Վալտեր» տեսակի հրազեն և տասը փամփուշտ։ Իրավապահները ավտոմեքենայից առգրավել են հրազենը և փամփուշտները` որպես իրեղեն ապացույց», – նշվում է գերատեսչության հաղորդագրության մեջ։

1947 թ.–ին ծնված Ֆրունզիկ Ա.–ն արդեն խոստովանել է իր մեղքը։

Փաստի առթիվ հարուցվել է քրեական գործ «Վրաստանի մաքսակետով հրազենի ներկրում կամ արտահանում` կանոնների խախտումով» հոդվածի հատկանիշներով, որը 5–8 տարվա ազատազրկում է նախատեսում։