Շանհայի բորսան չորեքշաբթի առավոտյան «տենդային» վիճակում է հայտնվել

ԵՐԵՎԱՆ, 26 օգոստոսի– Sputnik. Շանհայի ֆոնդային բորսայի ինդեքսն առավոտյան առուվաճառքի ժամանակ «տենդային» վիճակում էր հայտնվել, թեև Չինաստանի Կենտրոնական բանկը դեպոզիտների և վարկերի տոկոսադրույքները նվազեցնելու և ինդեքսների ֆյուչերսների պայմանները խստացնելու որոշում էր կայացրել։

Shanghai Compisite Index Շանհայի բորսայի առանցքային ցուցիչը երկօրյա անկումից հետո առուվաճառքի բացման ժամանակ ավելացել է 0,53%–ով, այնուհետև 20 րոպեի ընթացքում նվազել մինչև 2,31% և աճել մինչև դրական նիշ։

Կես ժամ անց ցուցիչն աճել է 0,74 տոկոսով և կազմել 2986,81 կետ, իսկ առավոտյան առուվաճառքի կեսերին Shanghai Composte–ը կրկին նվազել է մինչև 3,03 տոկոս` կազմելով 2875,10 կետ։

Shenzhen Composite Index–ը նվազել է 3,64 տոկոսով` մինչև 1685,45 կետ։

Չինաստանի Կենտրոնական բանկն ավելի վաղ հայտարարել էր, որ  չորեքշաբթի օրվանից 0,25 կետով նվազեցնում է դեպոզիտների և վարկերի տոկոսադրույքները։ Բացի այդ, սեպտեմբերի 6–ից ԿԲ–ը կնվազեցնի բանկերի համար պահեստավորման նորմերը 0,5 կետով։ Չորեքշաբթի China Financial Future Exchange ֆյուչերսային բորսան հայտարարել է ինդեքսի ֆյուչերսների առևտրային պահանջները բարձրացնելու մասին, որպեսզի կանխի չարաշահումները։

«Ընդհանուր առմամբ Չինաստանի ԿԲ–ի որոշումն օգնել է շուկային` չնայած զգալի փոփոխականությանը»,– Ֆրանս Փրես գործակալությանն ասել է Philip Securities–ի վերլուծաբան Չեն Սինյույը։ Փորձագետի կարծիքով` տոկոսադրույքների նվազումն «օգնում է հանել լարվածությունը, սակայն իրատեսական չէ ենթադրել, որ ԿԲ–ի միջոցը կարող է շուկան ամբողջությամբ նախկին վիճակի բերել»։