Հարյուրավոր հրշեջներ փորձում են մարել Բուրյատիայում բռնկված հրդեհները

ԵՐԵՎԱՆ, 26 օգոստոսի – Sputnik. Հրշեջների և փրկարարների նոր ստորաբաժանումները միացել են Բուրյատիայի անտառային հրդեհների մարման աշխատանքին, հայտնել է Ռուսաստանի արտակարգ իրավիճակների նախարար Վլադիմիր Պուչկովը։

«Հաշվի առնելով կանխատեսումը` մենք ուժեղացնում ենք Բուրյատիայում հրդեհների և՛ ցամաքային, և՛ ավիացիոն մարման խմբերը։ Մեկ օրում ԱԻՆ–ն արդեն մի քանի հարյուր պրոֆեսիոնալ հրշեջներ և փրկարարներ, հատուկ հանդերձանքով բուհերի կուրսանտներ է ուղարկել»,– ասել է նա։ Ստորաբաժանումները միանգամից ուղղվել են հրդեհների մարմանը։

«Ընդունվել են հակահրդեհային հատուկ ռեժիմի և «արտակարգ իրավիճակի» ռեժիմի կատարման բոլոր քայլերը, բայց առայժմ ոչ ամենուր, այդ պատճառով ամեն օր առանձին շրջաններում նոր օջախներ են հայտնվում, որոնք մեծանում են և ավելի շատ ջանքեր են պահանջում»,– պարզաբանել է Պուչկովը։

Նա միաժամանակ հայտնել է, որ թեև դժվարհասանելի վայրերում հրդեհների մակերեսն աճել է, դրությունը կայուն է։ «Մենք թույլ չենք տվել, որ հրդեհները հասնեն բնակավայրեր»,– ասել է նախարարը։

Ըստ նրա, բջջային խմբերն ապահովել են էլեկտրահաղորդումների գծերի, դաշնային մայրուղիների պահպանությունը։

Այդ կապակցությամբ Պուչկովը նշել է ՆԳՆ–ի, ԱԻՆ–ի, Պաշտպանության նախարարության, դաշնային այլ կառույցների, Բուրյատիայի արտակարգ իրավիճակների հանձնաժողովների և տեղական ինքնակառավարման մարմինների ինտենսիվ աշխատանքը։

«Խմբավորումն աշխատում է 24 ժամ շարունակ, բայց պետք է պահպանվեն անվտանգության բոլոր միջոցները, քանի որ ստորաբաժանումներն աշխատում են շոգի և բարդ ռելիեֆի պայմաններում»,– ասել է Պուչկովը։

Խորհրդակցության ընթացքում նա հրահանգել է խստորեն վերահսկել մարտական ստորաբաժանումների աշխատանքի շարունակական լինելը և ապահովել նրանց անհրաժեշտ տեխնիկայով։ «Հրդեհների մարման գոտիներում բացեք կենսաապահովման փոքր քաղաքներ»,– ասել է Պուչկովը։