ԵՐԵՎԱՆ, 27 օգոստոսի — Sputnik. Հայ գրոսմայստեր Լևոն Արոնյանը և բուլղարացի Վեսելին Տոպալովը գլխավորում են մրցաշարային աղյուսակը Սենտ Լուիսում անցկացվող Սինքֆիլդի Գավաթի չորրորդ տուրից հետո, հայտնում է chesspro.ru–ն։
Նախօրեին Արոնյանը հաղթել էր ամերիկացի Ուեսլի Սոյին։ Դա չորրորդ տուրի միակ հաղթանակն էր. Ալեքսանդր Գրիշչուկ (Ռուսաստան) –Վեսելին Տոպալով (Բուլղարիա), Անիշ Գիրի (Նիդեռլանդներ) – Մագնուս Կառլսեն (Նորվեգիա), Մաքսիմ Վաշիե–Լագրավ (Ֆրանսիա) –Խիկարու Նակամուրա (ԱՄՆ), Ֆաբիանո Կարուանա (ԱՄՆ) – Վիշի Անանդ (Հնդկաստան) պարտիաները ոչ–ոքի են ավարտվել։
Չորս տուրերից հետո Արոնյանը և Տոպալովը երեքական միավոր ունեն, նրանցից փոքր տարբերությամբ հետ են մնում Կառլսենը և Գիրին 2.5–ական միավորով, կես միավորով պակաս ունեն Նակամուրան և Վաշիե–Լագրավը, Գրիշչուկը և Սոն հավաքել են 1.5 ական միավոր, Անանդը և Կարուանան` մեկական։
Սինքֆիլդի գավաթը Grand Chess Tour–ի մի մասն է և անցկացվում է շրջանաձև համակարգով օգոստոսի 23–ից մինչև սեպտեմբերի 3–ը։ Ժամանակը` 120 րոպե առաջին 40 քայլի համար, այնուհետև` 60 րոպե մինչև պարտիայի ավարտը յուրաքանչյուր քայլի համար` 30 վայրկյան ավելացմամբ։