ԵՐԵՎԱՆ, 7 սեպտեմբերի– Sputnik. Վերջին շրջանում ղարաբաղյան հակամարտության գոտում իրավիճակը հերթական անգամ սրվել է, հաճախակի են դարձել Ադրբեջանի կողմից հրադադարի ռեժիմի խախտման դեպքերը, ինչպես նաև Բաքվի կողմից հնչող ռազմատենչ հայտարարությունները։
Վերջերս` սեպտեմբերի 4–ին, մարտական հանձնարարություն կատարելիս և հակառակորդի գործողությունները կանխելիս զոհվեցին ԼՂՀ պաշտպանության բանակի պայմանագրային զինծառայողներ Մարատ Խաչանյանն ու Արման Ստեփանյանը։
ԼՂՀ պաշտպանության նախարարության հայտարարությունը
Լեռնային Ղարաբաղի Հանրապետության պաշտպանության նախարարությունը կիրակի հանդես է եկել հայտարարությամբ, որում ընդգծվում է, որ առաջնային գծում ադրբեջանական զինուժի կողմից ձեռնարկվող սադրիչ գործողությունների հաճախականությունը և այդ ընթացքում կիրառվող զինատեսակների քանակական ու որակական աճի դինամիկան փաստում է, որ «Բաքուն, հանձինս իր ռազմաքաղաքական ղեկավարության, որդեգրել է իրավիճակը պատերազմականին մոտեցնելու հանցավոր մարտավարություն»։
«Այսօր արդեն Ադրբեջանը ոչ թե, ինչպես նախկինում էր, սեփական քարոզչությամբ փորձում է իր իսկ կողմից ձեռնարկվող նախահարձակ գործողությունները մատուցել որպես հայկական կողմին ուղղված պատասխան քայլեր, այլև տարբեր տրամաչափի հրետանային, ռեակտիվ հրթիռահրետանային և հրաձգային զենքերից` հայկական դիրքերի ուղղությամբ պարբերաբար իրականացվող արկակոծումներն ու գնդակոծումները բացահայտ լկտիությամբ ներկայացնում է ոչ այլ կերպ, քան իր ռազմական հնարավորությունները ցուցադրելու մարտավարական ու ռազմավարական կարևորության մտահաղացման իրագործում», – նշվում է հայտարարության մեջ։
ԼՂՀ պաշտպանության նախարարությունը նախազգուշացնում է, որ Ադրբեջանի ռազմաքաղաքական ղեկավարության կողմից որդեգրած այդօրինակ գործելաոճը ոչ միայն պատճառ է դառնում չարդարացված ու անդառնալի կորուստների, այլև դեպքերի նման զարգացման շարունակականության խորացումը հնարավոր է հանգեցնի անկանխատեսելի հետևանքների:
«Արցախի Հանրապետության ռազմական գերատեսչության ղեկավարությունը տեղեկացնում է ինչպես Ադրբեջանի պաշտպանության նախարարությանը, այնպես էլ ադրբեջանա-ղարաբաղյան հակամարտության խաղաղ կարգավորմամբ զբաղվող միջազգային կառույցներին, մասնավորապես` ԵԱՀԿ Մինսկի խմբի համանախագահներին, որ հակամարտ զորքերի շփման գծում տեղ գտնող հետագա սրացումների և դրանցից բխող հետևանքների ողջ պատասխանատվությունն ընկնում է ադրբեջանական կողմի վրա», – նշվում է հայտարարության մեջ։
ԵԱՀԿ–ի մտահոգությունը
ՀՀ նախագահ Սերժ Սարգսյանն ու ԵԱՀԿ գործող նախագահի անձնական ներկայացուցիչ Անջեյ Կասպրչիկը քննարկել են վերջին օրերին հայ-ադրբեջանական պետական սահմանին և ղարաբաղա-ադրբեջանական շփման գծում տիրող իրավիճակի հետ կապված հարցեր։ Կողմերը շաբաթ օրը տեղի ունեցած հանդիպման ժամանակ մտահոգություն են հայտնել շփման գծում հրադադարի ռեժիմի խախտման հաճախակի դարձած դեպքերի կապակցությամբ։
Բարձր մակարդակի հանդիպումներ
Այս ամենի ֆոնին նշանակալից է այն փաստը, որ ՀՀ նախագահ Սերժ Սարգսյանը սեպտեմբերի 7–ին կհանդիպի ՌԴ նախագահ Վլադիմիր Պուտինի հետ։ Ինչպես կարծում են փորձագետները, գլխավոր թեմաներից մեկը, որը կքննարկեն երկու երկրների ղեկավարները, կարող է դառնալ ղարաբաղյան հակամարտության խաղաղ կարգավորման հեռանկարը։
Այսպես, Ռազմավարական ուսումնասիրությունների կենտրոնի ղեկավար, քաղաքագետ Հրանտ Մելիք–Շահնազարյանի կարծիքով` ամեն ինչ խոսում է այն մասին, որ պաշտոնական Մոսկվան խստորեն անհանգստացած է Հարավային Կովկասում ստեղծված իրավիճակով և, ինչպես անցած տարվա օգոստոսին, պատրաստվում է օգտագործել իր ազդեցությունն ու հեղինակությունը՝ տարածաշրջանի թեկուզ և հարաբերական կայունությունը վերականգնելու համար:
Դա է հուշում նաև ՌԴ արտգործնախարար Սերգեյ Լավրովի՝ բոլորովին վերջերս Ադրբեջան կատարած այցը, ով այդ երկրի ղեկավար Իլհամ Ալիևի հետ հանդիպման ժամանակ հայտարարել է, որ «մենք Հայաստանի և Ռուսաստանի նախագհաների, ինչպես նաև Մինսկի խմբի համանախագահ երկրների ղեկավարությամբ փորձում ենք ընդհանուր հայտարարի բերել ղարաբաղյան հակամարտության թեման»: Նա նաև առաջընթացի գրանցման հույս է հայտնել։
Հայաստանի և Ռուսաստանի առաջնորդների հանդիպմանը հաշված ժամեր են մնացել, և մնում է միայն զինվել համբերությամբ և սպասել առաջընթացի, որի ձեռք բերման անհրաժեշտության մասին վերջերս բազմիցս խոսվել է ամենատարբեր մակարդակներում։
