Քաղաքական վերլուծաբան. Պատժամիջոցները կարող են Ադրբեջանին ավելի ռադիկալ դարձնել

ԵՐԵՎԱՆ, 27 սեպտեմբերի–Sputnik.Եվրամիությունը պետք է տարբերակված մոտեցում ցուցաբերի Արևելյան գործընկերության ծրագրի երկրների հետ իր հարաբերություններում, այդ երկրների հետ շփվելիս պետք է հաշվի առնի յուրաքանչյուր երկրի առանձնահատկությունը և չպետք է նույն մոդելով աշխատի բոլոր երկրների հետ, նման տեսակետ է հայտնել քաղաքագետ, քաղաքական վերլուծաբան Գևորգ Մելիքյանը՝ ելույթ ունենալով Վարշավայում մեկնարկած ԵԱՀԿ ամենամյա խորհրդակցության ժամանակ: «Sputnik-Արմենիա» ռադիոկայանի հետ զրույցում քաղաքագետն ընդգծեց, որ իր ելույթի հիմնական շեշտադրումը վերաբերում էր Եվրամիության քաղաքականությանը, մասնավորապես՝ Արևելյան գործընկերության ծրագրին:

«Իհարկե, ոմանց մի փոքր տարօրինակ թվաց, բայց կբացատրեմ ինչի մասին եմ խոսում: Ես համարում եմ, որ Եվրախորհրդարանը ճիշտ է արել, որ ընդունել է դատապարտող բանաձև Ադրբեջանի դեմ, նաև կարող են պատժամիջոցներ կիրառել Ադրբեջանի դեմ: Բայց ես կոչ արեցի, որպեսզի պատժամիջոցներն ուղեկցվեն ճնշման այլ մեթոդներով, որովհետև միայն պատժամիջոցները կարող են Ադրբեջանին ավելի ռադիկալ դարձնել, ինչը կարող է բացասաբար անդրադառնալ Հայաստանի և Արցախի անվտանգության վրա: Այսինքն, ես խոսում եմ այն մասին, որ երկարաժամկետ կտրվածքով չեմ ուզում տեսնել ավելի ռադիկալ Ադրբեջան»,-ընդգծել է Գևորգ Մելիքյանը:

Քաղաքագետի ներկայացմամբ՝ Հայաստանի պատվիրակության անդամներին մի փոքր տարօրինակ է թվացել իր ելույթի այդ մասը, բայց հետո հասկացել են, թե ինչի մասին է խոսքը:

«Ես ոչ թե կոչ եմ անում Ադրբեջանի դեմ ոչինչ չանել, այլ իմ ասածն այն էր, որ եթե կան պատժամիջոցներ և ավելի խիստ մոտեցումներ, ապա պարտադիր պետք է լինեն նաև զուգահեռ տարվող այլ միջոցներ, որոնցով, ամեն դեպքում, այդ երկիրը չպետք է մեկուսացվի, որովհետև մեզ, ամեն դեպքում, ձեռնտու չէ, որ Ադրբեջանը դուրս գա ԵԱՀԿ-ից կամ միջազգային մնացած հարթակներից: Երկարաժամկետ կտրվածքով դա մեզ ձեռք չի տալիս»,-նկատել է բանախոսը:

Քաղաքական վերլուծաբանն անհրաժեշտություն է համարում կանխատեսելի հարևաններ ունենալը, որի միտումները տեսանելի լինեն: «Երբ նրանք տարբեր հարթակներում խոսում են՝ մենք գոնե տեսնում ենք միտումները, տեսնում ենք ովքեր են ներկայացնում այդ կարծիքը, ինչ է տեղի ունենում այնտեղ, ինչ հիմնական ուղղություններ, հոսանքներ կան: Եթե մենք այլևս չտեսնենք և չլսենք նրանց, այդ երկիրը փակ լինի, ապա դա մեզ համար ձեռնտու չէ»,-իր տեսակետն է հստակեցրել նա:

Գեւորգ Մելիքյանի խոսքով՝ միջազգային նման հարթակները քաղաքացիական հասարկությանն արտահայտվելու լավ հնարավորություն են տալիս: