Արկտիկայում հայտնաբերել են մամոնտի մնացորդներ, որոնք պիտանի են կլոնավորման համար

ԵՐԵՎԱՆ, 8 հոկտեմբերի – Sputnik. Հյուսիսարևելյան դաշնային համալսարանի «Հյուսիսային Օյկումենա»  գիտարշավի մասնակիցները Լյախովի կղզիներում մամոնտի կմախքային մնացորդներ են հայտնաբերել, հայտնում է lenta.ru–ն` հղում անելով հաստատության մամուլի ծառայությանը։

Ինչպես նշվում է, բացառիկ գտածոներից մեկը վերացած կենդանու կաշին է։ Այն հետաքրքրություն է ներկայացնում «Մամոնտի վերածնունդ» նախագծի համար։ «Կորեացի մեր գործընկերները կարծում են, որ հենց կաշին է լավագույն նմուշը կենսունակ բջիջներն առանձնացնելու միջոցով կլոնավորման փորձ կատարելու համար», – նշել է գիտարշավի ղեկավար Սեմյոն Գրիգորևը։

Բացի այդ, նրանք գաճաճ մամոնտի ժանիք են հայտնաբերել։ Մասնագետների գնահատմամբ` կենդանու հասակը չի գերազանցել երկու մետրը։ Գիտնականները պետք է պարզեն` պատկանե՞լ է այդ կենդանին որևէ միկրոպոպուլյացիային, թե՞ այդ չափերն անհատական առանձնահատկություն են ունեցել։

Գիտարշավի մասնակիցները Յակուտսկ են տեղափոխել նաև չծնված մամոնտի ձագի էմբրիոնալ ատամը և տրոգոնտերիական մամոնտի ատամը։

«Հյուսիսային Օյկումենա» գիտարշավն անցկացվել է օգոստոսի 11-ից մինչև սեպտեմբերի 29-ը։ Գիտարշավին մասնակցել են մասնագետներ հինգ երկրից, նրանք աշխատել են  Յանա գետի ստորին հատվածներում։ Հիմնական ուսումնասիրություններն անցկացվել են Մեծ Լյախովի կղզում։