ԵՐԵՎԱՆ, 8 հոկտեմբերի– Sputnik. Ռուսական օդուժի ներկայությունը Սիրիայում լուրջ լարվածություն առաջացրեց ռուս-թուրքական հարաբերություններում, որը հետագայում խորանալու միտում ունի: Sputnik Արմենիա ռադիոկայանի հետ զրույցում նման մեկնաբանություն է արել պատմական գիտությունների թեկնածու, թուրքագետ Լևոն Հովսեփյանը:
Նրա խոսքով՝ ռուս-թուրքական հարաբերությունների վատթարացումը վկայում են հիմնականում թուրքական կողմի հարյտարարությունները:
«Նրանք մի կողմից ցույց են տալիս թուրքական կողմի անհանգստությունը, մյուս կողմից՝ փորձում են ինչ-որ կերպ նաև սպառնալիքի լեզվով խոսել Ռուսաստանի հետ: Համոզված եմ, առաջիկայում ականատես կլինենք ռուս-թուրքական հարաբերությունների էլ ավելի սրացմանը, որը կտարածվի նաև նախկինում ունեցած ռազմաքաղաքական դիմակայության մի շարք ոլորտների վրա»,- ասել է թուրքագետը:
Լևոն Հովսեփյանն ընդգծել է նաև, որ որքան էլ երկու երկրները տնտեսապես սերտաճած են ու լրջորեն փոխկապակցված, այնուհանդերձ, ներկայիս հարաբերություններն ազդեցություն կունենան տնտեսական մի շարք նախագծերի վրա:
«Եթե ոչ վերջնական դադարեցման, ապա սրանք լծակներ կլինեն միմյանց վրա ազդելու տեսանկյունից: Ամեն ինչ կախված է նրանից, թե ռուս-թուրքական հարաբերությունների լարվածությունը ինչպիսի միտումներ կդրսևորի»,-պարզաբանել է բանախոսը:
Թուրքագետի ներկայացմամբ՝ Թուրքիան արդեն փորձում է իր անվտանգությունն ակնհայտորեն կապել Արևմուտքի, մասնավորապես՝ ՆԱՏՕ-ի հետ:
«Եթե մինչ հիմա թուրքական կողմը փորձում էր զերծ մնալ ՆԱՏՕ-ի հովանու ներքո իր անվտանգության երաշխիքները ցույց դնելու քաղաքականությունից, ապա հիմա Թուրքիան, առավելապես պետք է թեքվի դեպի ՆԱՏՕ և շարունակի, որպես հյուսիսատլանտյան դաշինքի անդամ, ունենալ ՆԱՏՕ-ի անվտանգության երաշխիքները: Սա ևս էական ազդեցություն կունենա ռուս-թուրքական հարաբերությունների վրա»,- ընդգծել է Լևոն Հովսեփյանը:
Անդրադառնալով Թուրքիայի դերակատարմանը, մասնավորապես սիրիական ճգնաժամի հարցում, թուրքագետը նկատում է, որ այդտեղ կան հստակ գծված սահմաններ:
«Թուրքիային վերապահված է որոշակի դերակատարություն, և Թուրքիան երբեք չէր կարող անցնել այդ գծերը»,- վստահեցրել է թուրքագետ Հովսեփյանը:
Թուրքագետ. Ռուս-թուրքական հարաբերություններում լարվածությունը խորանալու միտում ունի
17:18 08.10.2015 (Թարմացված է: 17:51 12.10.2015)
© Sputnik / Руслан Кривобок
/ Բաժանորդագրվել
Թուրքագետը նշել է, որ որքան էլ երկու երկրները տնտեսապես սերտաճած են ու լրջորեն փոխկապակցված, այնուհանդերձ, ներկայիս հարաբերություններն ազդեցություն կունենան տնտեսական մի շարք նախագծերի վրա
