ԵՐԵՎԱՆ, 22 հոկտեմբերի – Sputnik. «ՌեԱնիմանիան» սովորական անիմացիոն փառատոնից վերածվել է անիմացիոն ֆիլմերի և պատկերապատումների արվեստի փսռատոնի: Սա է այս տարվա գլխավոր անակնկալը: Այս մասին Sputnik Արմենիա մամուլի կենտրոնում լրագրողներին ասաց փառատոնի հիմնադիր և տնօրեն Վրեժ Քասունին:
Հոկտեմբերի 28-ից նոյեմբերի 3-ը Երևանում կանցկացվի «ՌեԱնիմանիա» միջազգային 7-րդ փառատոնը, որի շրջանակում մայրաքաղաքի բնակիչներին կներկայացվի ավելի քան 400 անիմացիոն ֆիլմ, որոնցից 184-ը` մրցութային: Քասունին նշում է, որ այս տարի առանձնահատուկ ուշադրություն կհատկացվի Հայոց ցեղասպանության 100-րդ տարելիցին:
«Պատահական չէ, որ այս տարվա կարևոր ծրագրերից մեկը` «Վերածնունդը», նվիրված է Հայոց ցեղասպանության 100-ամյակին»,- ասաց Քասունին: Նրա խոսքով` շատ կարևոր է, որ Հայոց ցեղասպանությունից հետո հայերը չեն ընկճվել, այլ շարունակել են ապրել և նոր կենաց ծառեր տնկել:
«ՌեԱնիմանիա» փառատոնի տնօրենը ևս մի հետաքրքիր նորություն հայտնեց. հայտնի Animation Magazine ամսագիրը մի ամբողջ էջ է նվիրել «ՌեԱնիմանիա» փառատոնին, ինչը նշանակալի իրադարձություն է:
Այս տարի մրցույթի մասնակիցներին կդատի «հանրային ժյուրին», որի կազմում ոչ թե մասնագետներ կլինեն, այլ` փառատոնի ակտիվ հանդիսատեսը: Քասունին նաև ընդգծեց, որ կրթաթոշակ է սահմանվել ուսանողների համար:
«18-26 տարեկան ուսանողները Ֆրանսիայում վերապատրաստվելու հնարավորություն կունենան: Այսինքն` նրանք, ովքեր արդեն փորձ ունեն, բայց այն պետք է զարգացնել: Թեկնածուները կընտրվեն միջազգային մասնագետների կողմից ստացված հայտերի հիման վրա»,- ասաց Քասունին: Նրա խոսքով` ֆինանսական ծախսերն իր վրա է վերցնում Հայաստանում Ֆրանսիայի դեսպանատունը:
Նկարիչ Տիգրան Մանգասարյանն էլ նշեց, որ այս տարի միջոցառման ձևաչափն ավելի լայն կլինի, քանի որ փառատոնում կներկայացվեն Հայոց ցեղասպանությանը նվիրված և մինչ օրս թողարկված պատկերապատումները:
«12 գիրք կա, որոնց հրապարակել են տարբեր երկրներում: Ցավոք սրտի, հայ հանդիսատեսը այդ գրքերին ծանոթանալու հնարավորություն չի ունեցել, և հիմա մենք որոշել ենք դրանք ներկայացնել Հայաստանում»,- ասաց Մանգասարյանը: Նա նաև նշեց, որ այս տարի հրատարակվել է չորս գիրք, որոնցից երկուսը նվիրված են Սողոմոն Թեհլերյանին (Բեռլինում սպանել է Հայոց ցեղասպանության գլխավոր կազմակերպիչներից մեկին` Թուրքիայի ներքին գործերի նախկին նախարար Թալեաթ փաշային): Մանգասարյանը նշեց, որ այդ գրքերից մեկը` իտալացի հեղինակ Պաուլո Կոսիի «Նեմեսիս գործողություն. Սողոմոն Թեհլերյանը», լույս է տեսել Ֆրանսիայում:
«ՌեԱնիմանիա» միջազգային 7-րդ փառատոնին անակնկալներ կլինեն
18:40 22.10.2015 (Թարմացված է: 19:28 22.10.2015)
© Sputnik / Асатур Есаянц
Բաժանորդագրվել
Հոկտեմբերի 28-ից նոյեմբերի 3-ը Երևանում կանցկացվի «ՌեԱնիմանիա» միջազգային 7-րդ փառատոնը, որի շրջանակում մայրաքաղաքի բնակիչներին կներկայացվի ավելի քան 400 անիմացիոն ֆիլմ, որոնցից 184-ը` մրցութային
