ԵՐԵՎԱՆ, 22 հոկտեմբերի- Sputnik. Ռուսական բանակի Ա.Վ. Ալեքսանդրովի անվան երգի ու պարի համույթը ելույթ ունեցավ Ռուս-հայկական (Սլավոնական) համալսարանում: Ելույթը սկսեցին Ռուսաստանի ժողովրդական արտիստ Ալեքսանդր Տոշչևը և Եկատերինա Սեմյոնովան:
Հանդիսատեսը ջերմությամբ ընդունեց «O Sole mio» և «Ночь пройдет, наступит утро ясное» երգերը: Դահլիճը ծափերով դիմավորեց համույթի կազմում ընդգրկված խմբին, որը երգեց հայ հանդիսատեսի համար հարազատ դարձած «Армения моя» երգը:
Դահլիճում տրամադրությունը կտրուկ բարձրացավ, երբ հնչեց «Գեներալ» երգը՝ Ռուսաստանի վաստակավոր արտիստ Յուստինայի կատարմամբ: Հանդիսատեսը հաճելիորեն զարմացավ, երբ նա սկսեց հայերեն երգել: Ռուս արտիստները դրանով չսահմանափակվեցին: Հավաքվածների մոտ բուռն ոգևորություն առաջացրեց «Синий, синий иней» երգը՝ Տատյանա Կորեշևայի կատարմամբ: Ջերմ ընդունվեց նաև «Հայաստան» երգը, որը երգեց Ալեքսանդր Յալովսկիխը:
Համերգի ավարտին Վիկտոր Պրեդելինը ելույթ ունեցավ բալալայկայով, իսկ ամենավերջում արտիստները դահլիճի հետ երգեցին հանրահայտ «Կատյուշան»:
Տպավորիչ ելույթի համար համույթի անդամներին շնորհակալություն հայտնեց Հայաստանում Ռուսաստանի դեսպանատան դեսպանորդ Անդրեյ Իվանովը:
«Մենք գիտենք, որ Ալեքսանդրովի անվան համույթը հրաշալի կոլեկտիվ է, որը տարբերվում է բարձր պրոֆեսիոնալիզմով, ատլետիզմով, հիանալի երգերով և ժպիտ ու բարձր տրամադրություն է պարգևում հանդիսատեսին»,- ասաց Իվանովը:
ՌՀՀ ուսանողները նույնպես խոսեցին իրենց տպավորությունների մասին: «Այս համերգն էներգիայի անսահման լիցքեր փոխանցեց: Բոլոր երգերը մանկության հիշողություններ էին արթնացնում: Շնորհակալություն այդ հիշողությունների համար»,- ասաց Լիանա Թումանյանը:
«Անչափ շնորհակալ ենք, որ նաև հայերեն երգեցին: Մենք հիացած ենք և կրկին սպասում ենք նրանց»,- ասաց Ասյա Ասլանյանը:
Ինչպես Sputnik Արմենիա պորտալի հետ զրույցում նշեց «Ալեքսանդրով-պարկ» էստրադային խմբի գեղարվեստական ղեկավար Վլադիմիր Վացուրան, նա արդեն երրորդ անգամ է Հայաստան գալիս:
«Մենք համերգներ ենք կազմակերպում երկու տարին մեկ անգամ: Խումբը կազմված է 20 հոգուց, հիմքում «Ալեքսանդրով-պարկ» էստրադային խումբն է: Մենք միշտ հաճույքով ենք Հայաստան գալիս, որովհետև այստեղ շատ ջերմ են ընդունում մեզ: Արտիստներն աշխատում են ոգևորությամբ, այսօր նրանք մեծ բավականություն են ստացել դահլիճի հետ շփումից: Մենք շատ գոհ ենք»,- ասաց Վացուրան:
Համերգները կտևեն երեք օր` հոկտեմբերի 22-ից 24-ը: Համույթը ելույթ կունենա զինծառայողների ու նրանց ընտանիքների, ՌԴ ԱԴԾ սահմանապահ վարչության ներկայացուցիչների, Ռուսաստանի դիվանագիտական կորպուսի, Հայաստանի ուժային կառույցների ներկայացուցիչների համար:
Բացի Ռուս-հայկական (Սլավոնական) համալսարանից, համույթը ելույթ կունենա նաև Ռուսական ռազմակայանի սպաների տանը, Գյումրու Աճեմյանի անվան դրամատիկական թատրոնում: Համերգացանկում ներառվել են ժողովորդական երգեր ու պարեր, հոգևոր երաժշտություն, ռուս և արտասահմանցի կոմպոզիտորների դասական ու ժամանակակից ստեղծագործություններ:
