ԵՐԵՎԱՆ, 24 հոկտեմբերի- Sputnik. Երեկ Երևանում ցուցադրվեց սցենարիստ, տաղանդավոր գրող և հայրենասեր Մուշեղ Գբալշոյանի մասին պատմող ֆիլմը, որը նվիրված էր Մուշեղ Գալշոյանի 80-ամյակին և Հայոց ցեղասպանության 100-րդ տարելիցին:
Ֆիլմը պատմում է գրողի կյանքի և գործունեության մասին: Գրող, որի հոգու խորքում մեծ վերք էին թողել հայ ժողովրդի կոտորածները:
Մեծ եղեռնը հանգիստ չէր տալիս գրողին: Նա մշտապես խոսում ու գրում էր այդ մասին, զրուցում եղեռնից մազապուրծ եղած մարդկանց հետ, ամեն ինչ անում, որ մարդկությունը հասկանա, թե ինչ է իրականում Հայոց ցեղասպանությունը:
Ջերմ արձագանքներ
Ֆիլմում գրողները, պոետները, հրապարակախոսներն ու արվեստի գործիչները ջերմությամբ խոսում են Գալշոյանի մասին, հուշեր պատմում:
Ֆիլմի ռեժիսոր Տարոն Ղափլանյանը պրեմիերայից առաջ նշեց, որ վաղուց է ցանկացել ֆիլմ ստեղծել Գալշոյանի մասին, քանի որ լավ էր ճանաչում նրան:
«Նրա մասին շատ ֆիլմեր ու հաղորդումներեն նկարահանվել, բայց բոլոր աշխատանքները շատ ստանդարտ են եղել: Ուստի ես որոշեցի անդրադառնալ նրա ակնարկներին, որոնք արդիական են նաև այսօր: Ֆիլմի հիմնական թեման Գալշոյանի ակնարկներն են»,- նշեց Ղափլանյանը:
Ռեժիսորն ընդգծեց, որ Գալշոյանը երբեք ավելորդ ոչինչ չի խոսել, բոլորին բարիք է մաղթել և միաժամանակ շատ բարդ կյանք է ունեցել… Ֆիլմի նկարահանումներին մասնակցել է նաև անվանի գրողի աղջիկը՝ Սիրանույշ Գալշոյանը: Հենց նա էլ գրել է ֆիլմի սցենարը:
Ֆիլմի պրեմիերային ներկա էր նաև Երևանի քաղաքապետ Տարոն Մարգարյանը:
Մի քիչ կենսագրություն
Խորհրդային գրող և սցենարիստ Մուշեղ Գալշոյանը ծնվել է 1933թ.-ին Մեհրիբան գյուղում: Ավարտել է գյուղատնտեսական ինստիտուտը, որոշ ժամանակ աշխատել մասնագիտությամբ, հետո աշխատանքի անցել շրջանային թերթում: «Ավանգարդ» թերթում և «Գարուն» ամսագրում աշխատած տարիներին, լրագրական հոդվածներին զուգընթաց, գրել է իր առաջին վիպակը՝ «Ձորի Միրոն», որը նրան բերեց հասուն գրողի համարում։ Հետո մեկը մյուսին հաջորդեցին պատմվածքները՝ հավատարմության, ոգու ամրության և տոկոնության մասին: Մուշեղ Գալշոյանը մահացել է 1980 թվականին Կաթնաղբյուր գյուղում, հրացանի պատահական կրակոցից։
