ԵՐԵՎԱՆ, 27 հոկտեմբերի – Sputnik. Կիրակի օրը կայարանը լի է հեծանվորդներով. նրանք Երևանից Գյումրի են մեկնում՝ հեծանվամարաթոնի: Պատկերացնո՞ւմ եք` մի ամբողջ վագոն՝ լի հեծանիվներով:
Հեծանվամարաթոնը կարևոր առաքելություն ունի` Գյումրիում զարգացնել հեծանվային մշակույթը և խթանել, որ գյումրեցիներն այն որպես տրանսպորտային միջոց օգտագործեն։ Սիրողական հեծանվասպորտի և հեծանվային զբոսաշրջության ֆեդերացիայի նախաձեռնությանն են միացել բազմաթիվ հեծանվորդներ` անկախ տարիքից, սեռից, գործունեության բնույթից: Նրանք որոշել են հերթական կիրակին անցկացնել Գյումրիում և հաճելին համատեղել օգտակարի հետ:
Երեք ժամ` գնացքի անիվների վրա։ Երեք ժամ` չդադարող երգ ու պար, և հեծանվորդները հասնում են Գյումրու կայարան։ Նրանց դիմավորում են գյումրեցի հեծանվորդները, որոնց շարքում է նաև Ազգային ժողովի գյումրեցի պատգամավոր Մարտուն Գրիգորյանը:
«Այս քայլով ցանկանում ենք ցույց տալ, որ մենք ողջունում ենք այս մշակույթը և առողջ ապրելակերպը, բացի այդ, հեծանիվն էկոլոգիապես մաքուր փոխադրամիջոց է»,- նշում է Մարտուն Գրիգորյանը:
Մոտ 70 հոգուց բաղկացած հեծանվորդների խումբը ողջ օրվա ընթացքում շրջում է Գյումրու փողոցներով: Անցորդները չեն թաքցնում հետաքրքրությունը, վարորդները ողջունում են մեքենայի ազդանշանով։ Ողջ ակցիայի ընթացքում հեծանվորդներին ուղեկցում են պետավտոտեսուչները և ապահովում հեծանվորդների անվտանգ երթևեկությունը:
Հեծանվամարաթոնը նաև ճանաչողական բնույթ ունի: Հեծանվորդներից շատերը Գյումրիում չեն եղել և ակցիայի շնորհիվ ծանոթանում են քաղաքի պատմամշակութային ժառանգությանը:
Հեծանվորդներն այցելում են Ավետիք Իսահակյանի տուն-թանգարան, Հովհաննես Շիրազի թանգարան, Գյումրու մեծահարուստ ընտանիքներից մեկի՝ Ձիթողցյանների տուն-թանգարան, որը պահպանել է XVIII դարի ողջ կոլորիտը, անցնում են այն փողոցով ու բակով, որտեղ նկարահանվել է «Մեր մանկության տանգոն»:
«Վստահ ենք, որ այս ակցիան հեծանվային մշակույթի զարգացման խթան կհանդիսանա և հեծանիվը նաև Գյումրիում կսկսեն օգտագործել որպես տրանսպորտային միջոց»,- ընդգծում է Սիրողական հեծանվասպորտի և հեծանվային զբոսաշրջության ֆեդերացիայի նախագահ Արման Անտոնյանը:
Երևան վերադառնալուց առաջ հեծանվորդները որոշում են բաց չթողնել ավանդական ընդհանուր «սելֆի» անելու հնարավորությունը, այս անգամ արդեն` Վերածննդի պուրակում:
Գյումրու կայարանում գյումրեցի հեծանվորդները Երևան մեկնողներին հրաժեշտ են տալիս իրենց քաղաքում կրկին հյուրընկալելու ակնկալիքով:
