ԵՐԵՎԱՆ, 28 հոկտեմբերի– Sputnik. Երգելու կարողությունը կարող էր առաջանալ մարդկանց հին համայնքներում նրա համար, որպեսզի խմբակային երգելն օգներ մեր նախնիներին ավելի արագ ընդհանուր լեզու գտնել և համախմբվել ժամանակի պակասի դեպքում, հայտարարում են մարդաբանները Royal Society's Open Science ամսագրում հրապարակված հոդվածում։
«Մարդկանց և պրիմատների միջև առանցքային տարբերությունն այն է, որ մենք ընդունակ ենք ապրել ավելի մեծ սոցիալական խմբերում, քան նրանք։ Բոլոր խմբերն ու ազգությունները յուրացրել են երգելու արվեստը, և այդ համայնքների գրեթե բոլոր անդամները լավ թե վատ երգում են։ Մեր գործընկերներն արդեն ենթադրել են, կոլեկտիվ երգելը կօգնի սոցիալական համախմբվածություն ստեղծել այն ժամանակ, երբ ժամանակ չկա ամուր միջանձնային հարաբերություններ հաստատելու համար»,– հայտարարել է Էյլունեդ Փիրսն Օքսֆորդի համալսարանից (Մեծ Բրիտանիա)։
Փիրսը և նրա գործընկերները ստուգել են այդ գաղափարի արդարացիությունն օրիգինալ միջոցով. նրանք ստացել են Մեծ Բրիտանիայի աշխատավորների լուսավորչական ասոցիացիայի աջակցությունը և նրա օգնությամբ դասընթացներ կազմակերպել բոլոր ցանկացողների համար, որոնք անցկացվում են յոթ ամիս։
Նրանց զուգահեռ գիտափորձի մաքրության համար գիտնականներն արդեն դասընթացներ են անցկացրել, որոնց ընթացքում կամավորներն ինքնակամ զբաղվել են ակտիվության այլ կոլեկտիվ ձևերով. սովորել են տարբեր գեղարվեստական արվեստներ և արձակ գրել։
Ինչպես պարզվել է, երգելն իսկապես օգնել է դասընթացների մասնակիցներին միմյանց հետ կապեր հաստատել, բայց ոչ այնպես, ինչպես դա պատկերացրել են գիտնականները։ Պարզվել է, որ երկարաժամկետ հեռանկարում երգելը չի գերազանցում կոլեկտիվ նկարչությունը կամ ճարտարապետությունը։
Բայց մյուս կողմից այն եզակի առավելություն է ունեցել. հարցումները ցույց են տվել, որ երգելն ավելի շատ է մերձեցրել անծանոթներին, քան նկարչությունը կամ գրականությունն արդեն առաջին պարապմունքի ժամանակ։ Արդյունքում փորձերի մասնակիցները սկսել են ցուցադրել միմյանց նկատմամբ կապվածության հավասար մակարդակ։
Երգելու այդ անսովոր հատկությունը գիտնականներին հանգեցրել է այն մտքին, որ կարող էր յուրահատուկ էվոլյուցիոն դեր խաղալ. խմբակային երգեցողությունը կարող էր մերձեցնել հին մարդկանց մեծ խմբեր, որոնք մինչ այդ անծանոթ են եղել։ Այդ հմտությունն օգնել է մեր նախնիներին ողջ մնալ, եզրափակում են բրիտանացի գիտնականները։
