ԵՐԵՎԱՆ, 2 նոյեմբերի – Sputnik. Երիտասարդ տաղանդներ փնտրող «Կապույտ թռչուն» համառուսաստանյան բաց մրցույթի առաջին ծրագրի արդյունքներով մոսկվաբնակ 11-ամյա դաշնակահարուհի, միջազգային փառատոների բազմակի դափնեկիր Եվա Գևորգյանը դուրս է եկել եզրափակիչ, հաղորդում է russia.tv-ն:
Առաջին ծրագրի տասը մանակցից ժյուրին ընտրեց Մոսկվայից Եվա Գևորգյանին և Սոչիից 14-ամյա Կլարա Սեմենցովային, և նրանք անցան եզրափակիչ: Մյուս ութ մասնակիցները դեռևս հնարավորություն ունեն հայտնվել եզրափակչում՝ հավաքելով ձայներ հավաքելով ինտերնետային քվեարկության միջոցով։
«Եվան ձգտում է ոչ միայն սոսկ նոտաներ նվագել, այլ ունկնդրին փոխանցել երաժշտության ամբողջ գեղեցկությունն ու խորությունը: Եվայի տաղանդն անընդհատ զարգանում է, և նա ունի բոլոր հնարավորությունները` իրականացնելու իր երազանքը և դառնալու հայտնի դաշնակահարուհի»,- այսպես է ներկայացված 11-ամյա դաշնակահարուհին մրցույթի կայքում:
Ի դեպ, օրեր առաջ Եվա Գևորգյանն իր առաջին մենահամերգն ունեցավ Հայաստանում:
Երիտասարդ տաղանդներ փնտրող «Կապույտ թռչուն» համառուսաստանյան բաց մրցույթին, որն անցկացվում է «Ռոսիա» հեռուստաալիքով, մասնակցում են 5-15 տարեկան երեխաները: Կան տարբեր անվանակարգեր՝ էստրադային և օպերային վոկալ, բալետ և ժամանակակից պար, երաժիշտների, ակրոբատների, կրկեսային արվեստի մրցույթներ: Ամենատաղանդավոր 40 մասնակիցներին ընտրում է ժյուրին։
