ԵՐԵՎԱՆ, 6 նոյեմբերի– Sputnik. Մեծ Բրիտանիայի պատվիրակությունը, որն ավելի վաղ ժամանել է Եգիպտոսի Շարմ էլ Շեյխ քաղաք` տեղի օդանավակայանում անվտանգության համակարգը ստուգելու համար, մինչև հիմա խորհրդակցություն է անցկացնում Շարմ էլ Շեյխից յոթ հազար բրիտանացի զբոսաշրջիկներին տարհանելու համար, ուրբաթ գրում է եգիպտական լրատվական «Յոում 7» պորտալը` հղում անելով անվտանգության մարմիններում ունեցած աղբյուրին։
Զրուցակցի խոսքով` բրիտանական կողմը կոշտ պահանջներ է առաջադրել, որպեսզի զբոսաշրջիկները դուրս բերվեն հանգստավայրից առանց ուղեբեռի։ Բրիտանիայի քաղաքացիների բոլոր անձնական իրերը կտեղափոխվեն առանձին չվերթով։
Նախօրեին Եգիպտոսի քաղաքացիական ավիացիայի նախարար Հուսամ Քամալը հաղորդել է, որ հինգշաբթի Բրիտանիայից Շարմ էլ Շեյխ չեն ժամանել զբոսաշրջիկներով 17 չվերթեր և Մեծ Բրիտանիայում գրանցված ևս երկու ինքնաթիռներ, որոնք ժամանել են այլ եվրոպական երկրներից։
Հոկտեմբերի 31–ի վաղ առավոտյան Շարմ էլ Շեյխից դուրս եկած և առայժմ անհայտ պատճառներով Սինայի թերակղզում թռիչքից 23 րոպե անց վթարի ենթարկված ռուսական A321 ինքնաթիռի աղետից հետո Մեծ Բրիտանիան և մի շարք եվրոպական երկրներ դադարեցրել են ուղիղ ավիահաղորդակցությունն այդ քաղաքի հետ։ Նրանք անհանգստանում են իրենց քաղաքացիների անվտանգության համար։
Մեծ Բրիտանիան արգելել է իր ավիաընկերություններին բրիտանացի զբոսաշրջիկներին դուրս բերել Շարմ էլ Շեյխից և պատվիրակություն է ուղարկել Եգիպտոս` օդանավակայանի անվտանգության համակարգը ստուգելու և իր քաղաքացիների տարհանումը կազմակերպելու համար։
Եգիպտոսը Մեծ Բրիտանիայի այդ քայլն անվանել է ապշեցնող և խորհուրդ է տվել չեղյալ հայտարարել «անարդար» որոշումը։
Բրիտանական պատվիրակությունը զբոսաշրջիկներին Եգիպտոսից տարհանելու հարցերն է քննարկում
© Sputnik / Игорь Руссак
/ Բաժանորդագրվել
Անվտանգության մարմինների աղբյուրը «Յոում 7»ին հայտնել է, որ բրիտանական կողմը պահանջում է, որ զբոսաշրջիկները հանգստավայրից մեկնեն առանց ուղեբեռի
