ԵՐԵՎԱՆ, 19 նոյեմբերի –Sputnik. Այսօր տեղի է ունեցել ՀՀ կառավարության հերթական նիստը, որը վարել է ՀՀ վարչապետ Հովիկ Աբրահամյանը: Նիստի ընթացքում քննարկվել են կարկտահարությունից տուժածներին աջակցություն ցուցաբերելու, նոր էլեկտրակայան կառուցելու, երկրաշարժի հետևանքով անօթևան մնացած ընտանիքների բնակարանային խնդիրները լուծելու, ինչպես նաև դեղերի գնային տատանումներին վերաբերող հարցերը։
Աջակցություն կարկտահարությունից և քամիներից տուժածներին
Կառավարությունը որոշում է ընդունել աջակցություն ցուցաբերել Շիրակի և Լոռու մարզերում կարկտահարությունից տուժած համայնքներին: Այսինքն, գյուղացիներն ազատվում են 2013 և 2014 թվականներին հատկացված աշնանացան ցորենի առաջին վերարտադրության սերմացուի դիմաց ձևավորված պարտքերից:
Կառավարության մեկ այլ որոշմամբ` նախատեսվում է մարզերում քամու հետևանքների վերացման նպատակով մարզպետարաններին հատկացնել շուրջ 902448.2 հազ. դրամ: Հիշեցնենք, որ ուժեղ քամիների հետևանքով զգալի վնասներ էին կրել Արագածոտնի, Արմավիրի, Գեղարքունիքի, Լոռու, Կոտայքի, Շիրակի, Սյունիքի, Վայոց Ձորի և Տավուշի մարզերի մի շարք համայնքների բնակելի տներ ու պետական նշանակության շինություններ: Վարչապետ Հովիկ Աբրահամյանն առաջարկել է ստեղծել հանձնաժողով, որը կմեկնի մարզեր ու տեղում կուսումնասիրի վնասի իրական չափերը:
Կկառուցվի նոր էլեկտրակայան
Գործադիրը հավանություն է տվել կառավարության և «Ռենկո» ընկերության միջև կնքվող հուշագրին: Այն ենթադրում է, որ կառուցվելու է 234 ՄՎտ ընդհանուր հզորությամբ էլեկտրաէներգիա արտադրող նոր էլեկտրակայան: Հետագա խնդիրներից խուսափելու համար վարչապետը շահագրգիռ գերատեսչություններին հորդորել է ուշադիր լինել ու բացթողումներ չանել:
Լուծվում են երկրաշարժի հետևանքով անօթևան մնացած ընտանիքների բնակարանային խնդիրները
2008 թվականից ի վեր պետական աջակցությամբ իրականացվող բնապահպանական ծրագրի շահառու է ճանաչվել 5365 ընտանիք, որոնցից 2015 թվականի հոկտեմբերի 26-ի դրությամբ 4383 ընտանիքների բնակարանային խնդիրն արդեն լուծվել է: Դեռևս 965 ընտանիք բնակարան չունի: Հարցին նախատեսվում է անդրադառնալ 2015-2016 թվականների ընթացքում:
Դեղերի թանկացման մասին լուրերն անհիմն են
Ուսումնասիրվել են 50 ամենավաճառվող դեղերի գնային տատանումները: Արդյունքում` 60 տոկոսի գինը մնացել է անփոփոխ, 34 տոկոսինը` նվազել է 30 տոկոսով, իսկ մնացածը 3 տոկոսով թանկացել են:
Ի դեպ, վարչապետ Հովիկ Աբրահամյանը նախարարներին հորդորել է ակտիվորեն շփվել զանգվածային լրատվամիջոցների հետ:
«Մենք մեր ժողովրդից թաքցնելու ոչինչ չունենք, և պետք է դա ապացուցենք խոսքով և գործով»,-ավելացրել է Հովիկ Աբրահամյանը:
