ԵՐԵՎԱՆ, 21 նոյեմբերի- Sputnik. Բրյուսելի Մոլենբեկ թաղամասում անցկացված խուզարկության ժամանակ քիմիական և պայթուցիկ նյութեր են հայտնաբերվել, հաղորդում է Derniere Heure թերթը:
Ինչպես հայտնում է RTL հեռուստաալիքը, խուզարկություններն անցկացվել են նոյեմբերի 20-ին:
Ավելի վաղ Բրյուսելում ահաբեկչական սպառնալիքի ամենաբարձր մակարդակ էր հայտարարվել: Բելգիայի իրավապահ մարմինները հատուկ գործողություն են անցկացնում Փարիզում ահաբեկչական գործողությունների հետաքննության շրջանակում: Շաբաթ օրը փակվել է Բրյուսելի մետրոն:
Նոյեմբերի 13-ին Փարիզում միանգամից մի քանի ահաբեկչական գործողություն էր իրականացվել: Անհայտ անձինք կրակ էին բացել մայրաքաղաքի 10-րդ շրջանի ռեստորաններից մեկի ուղղությամբ, երեք պայթյուն էլ որոտացել էր «Սթադ դը Ֆրանս» մարզադաշտի անմիջական հարևանությամբ: Այդ պահին մարզադաշտում ընթանում էր Ֆրանսիա-Գերմանիա ֆուտբոլային հանդիպումը, որին ներկա էր նաև նախագահ Ֆրանսուա Օլանդը: Պայթյուն էր գրանցվել նաև «Բատակլան» թատրոնում, որտեղ անհայտ անձինք պատանդ էին վերցրել տասնյակ մարդկանց: Վերջին տվյալով՝ 129 մարդ է մահացել:
