ԵՐԵՎԱՆ, 25 նոյեմբերի — Sputnik. Ստամբուլում անցկացված միջազգային իսլամական տնտեսական կոնգրեսի ժամանակ Թուրքիայի նախագահ Թայիփ Էրդողանը հայտարարել է, որ Թուրքիայի իշխանությունը ռուսական ռազմական ինքնաթիռի կործանման մասին իմացել է միայն Ռուսաստանի Պաշտպանության նախարարության հաստատումից հետո։
«Այն, որ ինքնաթիռը պատկանում է Ռուսաստանի Դաշնությանը, պարզ դարձավ միայն այն ժամանակ, երբ այդ մասին հայտարարեց Ռուսաստանի իշխանությունը», — ասել է Էրդողանը։
Նա հայտնել է, որ Թուրքիայի օդային տարածք երկու ռազմական ինքնաթիռ է ներխուժել, որոնցից մեկը հեռացել է, իսկ մյուսը` ռմբակոծվել։
«Երեկ անհայտ պետության երկու ինքնաթիռ է խախտել մեր օդային տարածքը, և նրանց հինգ րոպեի ընթացքում 10 նախազգուշացում է արվել մեր զինվորականների կողմից։ Այնուհետև ինքնաթիռներից մեկը լքել է Թուրքիայի տարածքը։ Իսկ երկրորդը համառորեն շարունակել է խախտել մեր տարածքը։ Մեր սահմանը վերահսկող F-16 կործանիչները կրակ են ուղղաթիռի ուղղությամբ», — ասել է Էրդողանը։
Երեքշաբթի Սու-24 ռուսական ինքնաթիռը ավիավթարի է ենթարկվել Սիրիայում։ Ռուսաստանի նախագահ Վլադիմիր Պուտինը հայտնել է, որ օդանավը խոցվել է թուրքական F-16-ի կողմից սիրիական տարածքում և ընկել Սիրիայում, Թուրքիայի սահմանից 4 կմ հեռավորության վրա։ ՌԴ ԶՈՒ-ի գլխավոր շտաբը հայտնել է, որ խոցված Սու-24-ը Թուրքիայի սահմանը չի հատել և դա ապացուցվում է սիրիական հակաօդային պաշտպանության տվյալներով։ Թուրքիան պնդում է, որ ռուսական ինքնաթիռը խախտել է օդային տարածքը։
