Մերձավոր Արևելքի և Կենտրոնական Ասիայի երկրների ուսումնասիրությունների կենտրոնի տնօրեն Սեմյոն Բաղդասարովը Sputnik- ի թղթակցի հետ զրույցում խոսել է Կենտրոնական Ասիայի և Անդրկովկասի երկրների անվտանգության, արտաքին դերակատարների սադրանքների ու կանխարգելող միջոցների մասին։
- Ռուս-թուրքական հարաբերությունների սրման ֆոնին ի՞նչը կարող է ապակայունացնել Կենտրոնական Ասիայի և Հարավային Կովկասի երկրների իրավիճակը` արտաքի՞ն, թե՞ ներքին սպառնալիքները։
— Վերջին իրադարձություններից հետո Թուրքիան, ամենայն հավանականությամբ, պատասխան հարված կհասցնի միջինասիական և հարավկովկասյան ուղղությամբ։ Դրա ապացույցն է Թուրքիայի ԱԳՆ ղեկավար Մևլութ Չավուշօղլուի այցը Ադրբեջան, որտեղ թուրքական կողմը, ըստ էության, սադրանքով և ղարաբաղյան հակամարտության շուրջ իրավիճակի ապակայունացմամբ էր զբաղված։ Իսկ դա ինքնըստինքյան վտանգավոր է Ռուսաստանի սահմանների իրավիճակի և Անդրկովկասի համար։
Ինչ վերաբերում է Միջին Ասիային, պետք է հստակ հասկանալ, որ Թուրքիայի ազգային հետախուզությունը Միացյալ Նահանգների և ամերիկյան հետախուզության հետ ակտիվ աշխատել է տարբեր ոչ մեծ ահաբեկչական խմբավորումների հետ` և՛ «Ուզբեկստանի իսլամական շարժման», և՛ «Ջիհադի իսլամական միության», և՛«Արևելյան Թուրքստանի իսլամական շարժման» հետ։
-Հարավային Կովկասի և Կենտրոնական Ասիայի երկրները Ռուսաստանի հետ ինչպիսի՞ կանխիչ միջոցներ կարող են ձեռնարկել, որպեսզի լարվածությունն ավելի չխորանա։
— Առաջին հերթին, Ռուսաստանը պետք է Ադրբեջանին հասկացնի, որ ղարաբաղյան հակամարտության շուրջ իրավիճակի ապակայունացումն անթույլատրելի է, առավել ևս, որ Հայաստանը ՀԱՊԿ-ի անդամ է, և երկրում են գտնվում նաև ռուս սահմանապահները։
