ԵՐԵՎԱՆ, 4 դեկտեմբերի — Sputnik. Վրաստանի նախագահ Գեորգի Մարգվելաշվիլին հրաման է ստորագրել նախկին նախագահ Միխեիլ Սահակաշվիլուն Վրաստանի քաղաքացիությունից զրկելու վերաբերյալ, հայտնում է Սպուտնիկ Գրուզիան։
«Միխեիլ Սահակաշվիլին վրացական քաղաքացիությունից զրկվել է մեկ այլ պետության քաղաքացիություն ստանալու կապակցությամբ», — ասված է նախագահի հրամանագրում։
Սահակաշվիլին Վրաստանը գլխավորել է 2004-2007 և 2008-2013 թվականներին։ Իսկ հիմա Վրաստանում նրա դեմ մի քանի հոդվածներով քրեական գործ է հարուցված, նրան մեղադրում են պետբյուջեից մոտ 5 մլն դոլար սեփական կարիքների համար ծախսելու մեջ։ Ավելի ուշ Սահակաշվիլու նկատմամբ ներպետական հետախուզում էին հայտարարել։ Նա լքել էր երկիրը, երբ 2013 թվականի նոյեմբերին Վրաստանի նախագահ էր դարձել Գեորգի Մարգվելաշվիլին։
Վրաստանի արդարադատության նախարար Թեյա Ցուլուկիանին հոկտեմբերին հայտարարել էր, որ գերատեսչությունը սկսել է Սահակաշվիլուն քաղաքացիությունից զրկելու գործընթացը, քանի որ ուկրաինական կողմից պաշտոնական փաստաթուղթ էր ստացել այն մասին, որ Սահակաշվիլին Ուկրաինայի քաղաքացիություն է ստացել։
Վրացական օրենքների համաձայն, Վրաստանի քաղաքացին ինքնաբերաբար կորցնում է Վրաստանի քաղաքացիությունը, երբ մեկ այլ երկրի քաղաքացիություն է ստանում։ Սակայն քաղաքացիությունից զրկելու համար որոշակի գործընթաց է անցկացվում` Արդարադատության նախարարության ծառայությունները գործի վերաբերյալ եզրակացություն են պատրաստում և դիմում երկրի նախագահին, որպեսզի նա հաստատի։
