ԵՐԵՎԱՆ, 8 դեկտեմբերի – Sputnik. Հայաստանի հանրային ռադիոյի գործադիր տնօրեն Արմեն Ամիրյանը աշխատանքից ազատվելու դիմում է ներկայացրել և պատճառները շարադրել ֆեյսբուքի իր էջում։
Նա նշել է, որ Հայաստանի հանրային ռադիոյի աշխատակիցների հետ
1997 թվականից, իսկ շատերի հետ` դեռևս հեռուստատեսությունում աշխատանքի տարիներից, անցել է երկար ճանապարհ:
«Այդ ճանապարհին արձանագրել ենք բազմաթիվ ձեռքբերումներ, ստացել ենք մրցանակներ, պարգևներ, արժանացել ենք մեր ունկնդրի ջերմ ու շնորհակալ գնահատականին, ունեցել ենք ոգևորության, երբեմն էլ հիասթափության շրջաններ»,-նշել է Ամիրյանը:
Նա նշել է, որ շուրջ 19 տարի իր գործընկերների հետ ապրել է ընտանիքի պես: Կարեկցել ու սատարել են միմյանց դժվարին պահերին, ուրախացել ու հրճվել են իրենց զավակների, հարազատների, ընտանիքի անդամների հաջողություններով: Միշտ էլ գալիս է պահը, երբ ամեն սկիզբ իր ավարտն է ունենում:
«Սիրելի գործընկերներ, ես աշխատանքից ազատվելու դիմում եմ ներկայացրել և մասնակցելու եմ Հանրային հեռուստառադիոընկերության խորհրդի անդամի թափուր պաշտոնի համար հայտարարված մրցույթին: Հույս ունեմ, որ մեր աշխատանքային սկիզբը կունենա ոչ թե ավարտ, այլ շարունակություն` մի փոքր այլ ձևաչափի մեջ: Կուզեի ընդհանուր ժողովի ժամանակ բոլորիդ անհատապես շնորհակալություն հայտնել, սակայն հաշվի առնելով իմ հուզվող տեսակը, թույլ տվեք գրավոր ասել այն, ինչ թերևս չեմ հասցրել ասել Ձեզ»,- հստակեցրել է իր քայլը Ամիրյանը:
Նա շնորհակալություն է հայտնել բոլորին` իրենց մասնագիտական բարձր որակը և կարողությունները Հայաստանի հանրային ռադիոյի ծրագրերում ներդնելու, մարդկային բարի և գնահատող տեսակի, ունկնդրի հանդեպ անկեղծության, անաչառության և նվիրումի համար:
«Համոզված եմ, որ այսուհետև ևս շարունակելու եք Հայաստանի հանրային ռադիոյի ունկնդիրներին փոխանցել անաչառ լրատվություն, բացելու եք մեր մշակութային հարուստ գանձարանի դռները, առաջնորդելու եք մատաղ սերնդին, երիտասարդներին` նպատակներն ու ցանկություններն իրականացնելու գործում և շարունակելու եք բարության, գեղեցկության, հայրենասիրության ու հայրենապաշտության կենարար հունդերը սերմանել մեր ժողովրդի սրտերում ու հոգիներում»,- նշել է Արմեն Ամիրյանը:
Արմեն Ամիրյանը Հայաստանի հանրային ռադիոյի գործադիր տնօրենն է 1997 թվականից։
