ԵՐԵՎԱՆ, 8 դեկտեմբերի – Sputnik. ՄԱԿ–ի անվտանգության խորհուրդը երեքշաբթի Իրաքի տարածք թուրքական ռազմական ուժեր մտցնելու վերաբերյալ նիստ կանցկացնի, ՌԻԱ Նովոստիին հայտնել է ՄԱԿ–ի աղբյուրը։
«Ռուսաստանը գումարել է ՄԱԿ ԱԽ նիստ` կապված Թուրքիայի կողմից Իրաքի տարածք ուժեր մտցնելու հետ», – հայտնել է գործակալության զրուցակիցը։
Իրաքի իշխանությունների տվյալներով` դեկտեմբերի 4-ին թուրքական տանկային գումարտակը մտել է Իրաքի Նայնավա գավառ` ահաբեկիչների դեմ պայքարող քրդական ժողովրդական ջոկատների մարտիկներ նախապատրաստելու պատրվակով։ Իրաքի դիվանագիտական գերատեսչությունը և ՊՆ–ն թուրքական զորքերն անվանել են «թշնամական գործողություններ», որոնք իշխանությունների հետ չեն համաձայնեցվել։
Կիրակի Իրաքի վարչապետ Ալ Աբադին հայտնել էր, որ երկրի իշխանությունները պահպանում են իրենց իրավունքը` դիմելու ցանկացած հնարավոր միջոցի, ներառյալ ՄԱԿ–ի ԱԽ–ին դիմելը, եթե թուրքական զորքը 48 ժամվա ընթացքում չլքի երկրի տարածքը։ Երկուշաբթի նա հայտնել էր, որ Թուրքիային մնացել է 24 ժամ մինչև հարցը կդնեն ՄԱԿ–ի ԱԽ–ի քննարկման։
