ԵՐԵՎԱՆ, 9 դեկտեմբերի- Sputnik. Հունիսից թողարկվող ունիվերսալ Pepper ռոբոտները վաճառվում են մեկ րոպեում, չորեքշաբթի հայտնում է FujiSankei Business ֆինանսական թերթը։
Արդեն կես տարի է` ամսական 1000 ռոբոտ է վաճառքի հանվում։ Բարձր պահանջարկի պատճառով Pepper-ը կարելի է գնել միայն նախապես պատվիրելու դեպքում։
Ռոբոտը կարելի է տարբեր հավելվածների միջոցով «կցել» սմարթֆոնին, և նա կխաղա երեխայի հետ, կգտնի անհրաժեշտ տեղեկատվությունը, կխոսի տիրոջ հետ, կհիշեցնի ծրագրած գործերի մասին։ Ամեն ամիս վաճառքի հանվող 1000 ռոբոտները վաճառվում են մեկ րոպեում։
Pepper արտադրող SoftBank բջջային օպերատորը որոշել է դեկտեմբերին ավելացնել վաճառվող արտադրանքի ծավալը (1000-ի փոխարեն կվաճառվի 1300 ռոբոտ)։ Լրացուցիչ 300 ռոբոտները կվաճառվեն ոչ թե նախապատվերով, այլ` վիճակահանության սկզբունքով։ Գնորդներին բոլորովին չի խանգարում նույնիսկ ռոբոտի գինը` մոտավորապես 10 հազար դոլար։
Մշակողների մտահղացմամբ` Pepper-ը պարզապես օգտակար խաղալիք չէ. տարբեր հավելվածների շնորհիվ այն կարող է վերածվել օտար լեզվի ուսուցչի, անձնական մարզչի և դայակի։
