ԵՐԵՎԱՆ, 9 դեկտեմբերի – Sputnik. «Իսլամական պետության» (արաբական տարբերակ` ԴԱԻՇ) ահաբեկչական գործունեությունը և Աֆղանստանի իրավիճակի վատթարացումն իրական սպառնալիք են ստեղծել ՀԱՊԿ պատասխանատվության գոտում միջազգային կայունությանը, չորեքշաբթի հայտնել է կազմակերպության գլխավոր քարտուղարի տեղակալ Վալերի Սեմերիկովը։
«Եվրոպայում ԻԼԻՊ–ի (արգելված է ՌԴ–ում) ահաբեկչական գործողությունները, Աֆղանստանի բարդ իրավիճակը միանշանակ հանգեցնում են նրան, որ աճում է լարվածությունն ու վտանգը մեր կազմակերպության անդամ պետությունների հավաքական անվտանգությանն իր պատասխանատվության գոտում», – ասել է նա Ռազմական կոմիտեի նիստի բացման ժամանակ։
Նրա խոսքերով` «ԻՊ» սանձազերծած «տոտալ պատերազմը» բերել է զգալի մարդկային զոհերի և ավերվածությունների, դեպի Եվրոպա փախստականների զանգվածային հոսքի։ «Սա թույլ է տալիս խոսել մարդասիրական աղետի սպառնալիքի մասին», – փաստել է Սեմերիկովը։
ՌԴ ՌՈՒ գլխավոր շտաբի պետ, բանակի գեներալ Վալերի Գերասիմովն իր հերթին ասել է, որ իրավիճակը աշխարհում «փոխվում է տարբեր տարածաշրջաններում և ամենևին էլ ոչ դեպի լավը»։ Նրա խոսքերով` ՀԱՊԿ պետությունների ղեկավարները փորձում են միավորել համաշխարհային հանրությանն` ահաբեկչության դեմ պայքարի լայն կոալիցիա ստեղծելու համար։
ՀԱՊԿ–ի անդամ պետությունների հավաքական անվտանգությունն ապահովելու հարցը կքննարկվի նաև ՀԱՊԿ–ի արտահերթ նիստի ժամանակ, որը նախատեսվում է անցկացնել Մոսկվայում այս տարվա դեկտեմբերին, հիշեցրել է ՀԱՊԿ գլխավոր քարտուղարի տեղակալը։
