ԵՐԵՎԱՆ, 15 դեկտեմբերի-Sputnik. Գոհար Սարգսյան. Ցանկացած մարդ կարող է այցելել տեղամասային պոլիկլինիկա ու անվճար պատվաստվել «խոզի գրիպով» կամ գրիպի մի քանի այլ ենթատեսակներով չհիվանդանալու համար:
Պատվաստանյութը 6-12 ամսով ապահովագրում է մարդուն գրիպի 3 ենթատեսակներով հիվանդանալուց:
«Չգիտեի, որ բոլոր ցանկացողները կարող են պատվաստվել: Կարծում եմ, որ այս հարցում թերանում են պոլիկլինիկաներն ու չեն իրազեկում: Իմ շրջապատում քչերը գիտեն դրա մասին, այնինչ սեզոնային վիրուսների ժամանակ պատվաստվելն անհրաժեշտ է: Հատկապես, երբ աշխատող ես ու բացակայելը «թանկ» արժե»,-ասում է մեր համաքաղաքացի Աննան, ով մինչև այսօր գիտեր, թե պատվաստանյութերը բաժանվել են միայն թիրախային խմբերին:
Պատվաստանյութերի թեման արդիական է դառնում, երբ վիրուսները «գլուխ են բարձրացնում»:
H1N1-ը կամ առավել հայտնի «խոզի գրիպը» հոկտեմբերից մինչև այսօր Հայաստանում 3 մարդու «դուռ է թակել», ընդ որում՝ մեկը հղի կին է, երկուսը` երեխա: Հայաստանի առողջապահության նախարարությունից հավաստիացնում են, որ դեպքերն ունեցել են թեթև ընթացք, և հիվանդներն արագ ապաքինվել են:
Մասնագետները շտապում են հորդորել` խուճապի մատնվել պետք չէ: «Խոզի գրիպը» հետևանք չի թողնում, եթե մարդն ունի բարձր իմունիտետ և ժամանակին է բժշկի դիմում` մոռանալով ինքնաբուժության մասին:
Ի դեպ, հարևան Իրանում վերջին շրջանում գրանցվել են «խոզի գրիպի» բազմաթիվ դեպքեր: Ավելի վաղ հայտնի էր դարձել, որ H1N1 գրիպի համաճարակը 28 մարդու կյանք էր խլել Իրանի Քերման նահանգում, իսկ 5-ը մահացել է Բելուջիստան և Սիստան նահանգներում: Իրանի առողջապահության նախարարությունը զգուշացրել է, որ վարակը կարող է տարածվել երկրի մյուս նահանգներում, այդ թվում` Թեհրանում: Այսօր այնտեղ մահվան ելքով դեպքերի թիվը հասել է 40-ի:
«Իրանի Իսլամական Հանրապետությունում իրավիճակը պարզաբանելու համար Հայաստանի առողջապահության նախարարությունը դիվանագիտական խողովակներով հարցում է կատարել Իրան, որտեղից պաշտոնապես հայտարարել են՝ համաճարակ չկա, և իրավիճակը դիտարկվում է սեզոնային գրիպի համատեքստում»,-ասում է ԱՆ հիվանդությունների կանխարգելման և վերահսկման ազգային կենտրոնի համաճարակաբանության բաժնի պետ Լիանա Թորոսյանը:
Տեղեկացնենք, որ H1N1-ը դասվել է մարդուն բնորոշ սեզոնային գրիպի ենթատեսակների շարքին: Դրանից զգուշանալ է պետք, բայց ոչ` վախենալ:
