ԵՐԵՎԱՆ, 19 դեկտեմբերի — Sputnik. 1979 թվականի հեղափոխությունից հետո Իրանի Իսլամական Հանրապետությունը լավագույն քաղաքական դիրքն է զբաղեցնում տարածաշրջանում և աշխարհում, Sputnik Արմենիա պորտալին ասաց իրանագետ Վարդան Ոսկանյանը։
«Իրանը և՛ վեցյակի հետ ստորագրած համաձայնագրի շրջանակում, և՛ տարածաշրջանային լուրջ գործընթացներում այսօր ամենալավ դիրքն է զբաղեցնում Իսլամական բանաձևի հաղթանակի պահից ի վեր»,- ասաց Ոսկանյանը։
Նրա խոսքով` Իրանն օգտվում է դրանից ինչպես ներքին քաղաքականության մեջ, այնպես էլ իր դիրքը միջազգային հարթակում ամրապնդելու համար։
Մեկնաբանելով Իրանի արձակած բալիստիկ հրթիռի հետ կապված իրավիճակն ու ՄԱԿ-ի դիրքորոշումը` Ոսկանյանը նշեց, որ վեցյակի հետ բանակցություններում լուրջ փոփոխություններ չեն լինի։
«Կարող են որոշակի փոփոխություններ լինել կողմերի հռետորաբանության մեջ, քանի որ ԻԻՀ-ի հակառակորդների և մրցակիցների համար հրթիռի արձակումը, մեղմ ասած, տհաճ է։ Չեմ կարծում, որ բանակցային գործընթացը կդադարեցվի։ Բանակցությունները կընթանան իրենց հունով, ինչպես նախկինում»,- ասաց Ոսկանյանը։
Նրա խոսքով` իրանական կողմը կոշտ դիրքորոշում կցուցադրի բանակցությունների ընթացքում, սակայն այս փուլում մեկնարկային շահավետ պայմաններ ապահովելու համար կողմերը կարող են հետ կանգնել սկզբնական հայտարարություններից, սակայն դա որևէ զգալի փոփոխություն չի բերի։
«Եթե ընդհանրացնենք իրանական հասարակության շրջանում տիրող տրամադրությունը, կարելի է ասել, որ Իրանը մեծ ակնկալիքներ ունի։ Հոռետեսական տրամադրվածություն էլ կա, սկզբնական էյֆորիան մի փոքր նվազել է, սակայն իրանցիների մեծ մասն այդուհանդերձ սպասում է, որ վեցյակի հետ բանականությունները դրական ելք կունենան»,- նշեց իրանագետը։
Իրանն ու միջազգային բանակցողների «վեցյակը» 2015 թվականի հուլիսին պատմական համաձայնության են եկել իրանական ատոմի բազմամյա խնդրի կարգավորման շուրջ։
Բարդ բանակցությունների արդյունքում ընդունվել է գործողությունների համատեղ ծրագիրը, որը կատարելու դեպքում Իրանը լիովին կազատվի ՄԱԿ-ի ԱԽ-ի, ԱՄՆ-ի և Եվրամիության սահմանած տնտեսական և ֆինանսական պատժամիջոցներից։
