ԵՐԵՎԱՆ, 29 դեկտեմբեր — Sputnik. Քննիչները բացահայտել են քաղաքագետ Բորիս Նեմցովի սպանության ենթադրյալ պատվիրատուի անունը։ Ամենայն հավանականությամբ սպանության պատվիրատուն «Հյուսիս» գումարտակի նախկին սպա Ռուսլան Մուխուդինովն է, որի անունը նախկինում հիշատակվում էր միայն որպես հանցագործության կազմակերպիչ։
«2015 թվականի նոյեմբերից միջազգային հետախուզման մեջ գտնվող, կատարված հանցագործությունների կազմակերպիչ ու պատվիրատու Ռուսլան Մուխուդինովի, ինչպես նաև այլ չբացահայտված անձանց նկատմամբ նախատեսվում է առանձին վարույթով քրեական գործ հարուցել և շարունակել հետաքննությունը», — երեքշաբթի հայտնել է ՌԴ ՔԿ-ն։
Իրավապահ մարմինների տվյալով` Մուխուդինովը կեղծել է փաստաթղթերն ու լքել Ռուսաստանը, այժմ գտնվում է ԱՄԷ-ում։
Հետախուզվող սպայի պաշտպանը հայտում է, որ Մուխուդինովի ազգանունը ձերբակալված անձանցից որևէ մեկը չի հիշատակել։ Փաստաբանը պարզաբանել է, որ որոշ մեղադրյալներ պատմել են, որ սպանությանը մասնակցել է «Ռուսիկ» անունով անձը, սակայն ամբողջական անուն կամ ազգանունը չի նշվել։ Բացի այդ, հետագայում նրանք հրաժարվել են իրենց ցուցմունքներից։
Գործի նյութերի համաձայն` Մուխուդինովի դեմ ցուցմունքներ են տվել ենթադրյալ մարդասպան Զաուր Դադաևը և Գուբաշև եղբայրները։ Սակայն բոլոր երեքն էլ հետագայում հրաժարվել են իրենց ցուցմունքներից։
Հետաքննությունը հիմնվում է նաև Վեերնայա փողոցի վրա գտնվող ենթադրյալ հանցագործների տան մաքրությամբ զբաղվող վկա Իսոևայի ցուցմունքների վրա։ Նա պատմել է, որ մեղադրյալները, այդ թվում և Մուխուդինովը, քննարկում էին Նեմցովի քաղաքականությունն ու նրա կրոնական հայացքները։
Մուխուդինովի նկատմամբ սպանության և ապօրինի զենք կրելու մեղադրանք է առաջադրվել։ Նրա նկատմամբ դաշնային և միջազգային հետախուզում է հայտարարվել։
