ԵՐԵՎԱՆ, հունվարի 3 – Sputnik. Հարյուրավոր ցուցարարներ են կիրակի հավաքվել Թեհրանում Սաուդյան Արաբիայի դեսպանատան մոտ, որի վրա նախօրեին հարձակում էր իրականացվել` կապված սաուդյան իշխանությունների կողմից շիադավան քարոզիչ Նիմր ան Նիմրին մահապատժի ենթարկելու հետ, հայտնում է ՌԻԱ Նովոստին` հղում անելով Ասոշիեյթեդ Փրես գործակալությանը:
Ականատեսների վկայությամբ` քաղաքի իշխանությունները կոչ են արել ցույցեր չանցկացնել դեսպանատան մոտ, այլ կազմակերպել դրանք մայրաքաղաքի կենտրոնական հրապարակում, սակայն շուրջ 400 մարդ անտեսել է այդ խնդրանքը: Ցուցարարները, Սաուդյան Արաբիայի թագավորական տոհմին դիմելով. Բացականչում են. «Մահ ալ Սաուդին»:
Սաուդյան Արաբիայի ՆԳՆ-ն շաբաթ օրը հայտարարել էր ահաբեկչության մեջ մեղադրվող 47 անձանց նկատմամբ մահապատիժ կիրառելու մասին: Մահապատժի ենթարկվածների թվում էին նաև Սաուդյան Արաբիայում Ալ Քայիդայի առաջնորդներից Ֆարիս ազ Զահրանին և շիադավան քարոզիչ ան Նիմրը: Նրա մահապատիժը բողոքի ալիք բարձրացրեց, և հարձակում իրականացվեց Իրանի մայրաքաղաքում գտնվող Սաուդյան Արաբիայի դեսպանատան վրա: Ոստիկանությանը հաջողվեց հետ մղել անկարգությունները հրահրողներին, նաև ձերբակալեց 40 մարդու:
Քարոզիչը Սաուդյան Արաբիայի իշխանությունների կողմից ձերբակալվել էր 2012 թվականին երկրի արևելքում անցկացված բողոքի ակցիայի ժամանակ: 2014 թվականին նրան դատապարտել էին մահապատժի` ատելություն հրահրելու, թագավորին չհնազանդվելու ու իրավապահ մարմինների աշխատակիցների վրա հարձակում իրականացնելու նպատակով ահաբեկչական խումբ ստեղծելու մեղադրանքով:
