ԵՐԵՎԱՆ, 14 հունվարի- Sputnik, Լաուրա Սարգսյան. Հարյուրավոր հավատացյալներ հավաքվել են սուրբ Հովհաննես Մկրտիչ եկեղեցում, որը գտնվում է Երևանի ամենահին ու սեփական դիմագիծն ունեցող թաղամասերից մեկում` Կոնդում։ Այսօր այստեղ եկեղեցական տոնի` Հովհաննես Մկրտչի ծննդի առիթով բերվել են սրբի մասունքներ։
Նրանցից մեկը փոքրիկ Հովհաննեսն է։ Նա ամեն տարի սպասում է Հովհաննես Մկրտչի տոնին, ում պատվին ստացել է իր անունը։
«Սիրում եմ այս տոնը։ Այս օրը միշտ նվերներ եմ ստանում»,- ասաց Հովհաննեսը Sputnik Արմենիայի հետ զրույցում։
Պատահական չէ, որ Հովհաննեսի ծնողներն առաջնեկին սրբի անունով են կոչել. նրանք միմյանց հավատարմության երդում են տվել հենց Սուրբ Հովհաննես Մկրտիչ եկեղեցում։
«Սա հույսի, հավատի, սիրո տոն է։ Շատ կարևոր է, թե ինչ զգացողությամբ ես մտնում եկեղեցի։ Եթե գալիս ես հավատով և հավատով ես հաղորդակցվում սրբի մասունքներին, ապա այդ հավատը կփրկի քեզ»,- պատմում է հավատացյալներից մեկը` Ռուզաննա Սիմոնյանը։
Յուրաքանչյուրն իր աղոթքն է անում` պատարագի ընթացքում պարբերաբար ձայնակցելով և աղոթք արտասանելով, որը քահանայի կողմից անցկացվող ևս մեկ ծես է։ Պատարագից հետո հավատացյալները հաղորդակից էին լինում մասունքներին։
Ավետարանի համաձայն` Հովհաննեսը կանխագուշակել է Հիսուս Քրիստոսի գալուստը։ Նա ճգնավորի կյանք է վարել անապատում և առաքյալների համաձայն` սկիզբ է դրել մկրտությանը։ Հենց Հովհաննեսն է մկրտել Քրիստոսին և ստացել «Մկրտիչ» անունը։
«Մենք ստացել ենք Մայր Աթոռ Սուրբ Էջմիածնի օրհնությունը և Հովհաննեսի մասունքները բերել նրա անունը կրող եկեղեցի։ Երեկոյան ժամը 5-ին մասունքները կվերադարձվեն Էջմիածին»,- հայտնեց սուրբ Հովհաննես եկեղեցու քահանա Զգոն Աբրահամյանը։
Մինչ ընթանում էր պատարագը, եկեղեցու բակում Կոնդի բնակիչները խարույկ վառեցին։ Մատաղի առաջին բաժինն արդեն եփված էր ու սպասում էր հյուրերին` եկեղեցու այցելուներին։ Տղամարդիկ փայտ էին կոտրում, կանայք` ձավար ու բրինձ լվանում, որպեսզի հարիսա ու շիլա պատրաստեն բոլոր հավատացյալների համար։
