Լաուրա Սարգսյան, Sputnik.
Բոլոր տոմսերը վաճառված են, իսկ Արամ Խաչատրյանի անվան պետական ֆիլհարմոնիայի դահլիճը լեփ-լեցուն է։ Մարդիկ շտապում են զբաղեցնել սրահի 1350 տեղերից մեկը, չէ՞ որ երեկոն խոստանում է հատկապես դասական լինել:
«Մենք եկել ենք լսելու ստեղծագործությունների հետաքրքիր ընտրանի երկու տաղանդավոր Սերգեյների՝ Սմբատյանի (նվագախմբի գեղարվեստական ղեկավար) և Խաչատրյանի (ջութակահար) գլխավորությամբ»,- ասում է դասական երաժշտության սիրահար Աննա Առաքելյանը:
Բարձրանում եմ պատշգամբ: Համերգասրահի աշխատակցուհին զիջեց իր աթոռը: Համերգի առաջին մասը բաղկացած էր անվանի հայ կոմպոզիտոր Էդվարդ Միրզոյանի ստեղծագործություններից, ում 95-ամյակին է նվիրված փառատոնը:
Հայաստանի պետական երիտասարդական նվագախմբի ավելի քան 30 անդամները համերաշխ թերթում են նոտաները (նշենք, որ նվագախումբը հիմնել է հենց Սերգեյ Սմբատյանը 2005թ.-ին և մինչ օրս խմբի գեղարվեստական ղեկավարն ու գլխավոր դիրիժորն է): Ջութակի, թմբուկների և կոնտրաբասի հնչյունների ներքո շունչ են առնում կամերային և սիմֆոնիկ ստեղծագործությունները:
«Շատ կարևոր է, որ փառատոնը մեկնարկեց այնպիսի մակարդակի ջութակահարի մասնակցությամբ, ինչպես Սերգեյ Խաչատրյանն է: Նա այն երաժիշտներից է, որոնց հետ աշխատանքը հաճույք է պատճառում»,- համերգից առաջ Sputnik Արմենիա պորտալին ասաց Սերգեյ Սմբատյանը։
Ահա առաջին մասը ետևում է, նվագախումբը պատրաստվում է երկրորդին: Սակայն կուլիսներում լսվում են երաժշտության հնչյուններ: «Սերգեյ Խաչատրյանն է փորձ անում ելույթից առաջ»,- բացատրում է մեզ նվագախմբի անդամներից մեկը:
Լույսերը մարեցին, և սկսվեց երաժշտությունը: Հնչեց Խաչատրյանի ջութակը, և երևանյան բեմում տեղի ունեցավ ժամանակակից կոմպոզիտոր Խաչատուր Մարտիրոսյանի «Կոնցերտ-ֆանտազիա» ստեղծագործության պրեմիերան:
Միջոցառումից հետո, որն արժանացավ հանդիսատեսի բուռն ծափահարություններին, դասական երաժշտության սիրահարների կարծիքները բաժանվեցին: Ներկաների շարքում կարելի էր լսել Մարտիրոսյանի ստեղծագործության վերաբերյալ ինչպես դրական, այնպես էլ բացասական կարծիքներ: Շատերը պնդում էին, որ երեկոն ստացվեց, բայց նոր ստեղծագործությանը չփրկեց անգամ մեր ժամանակների մեծագույն ջութակահարներից մեկը:
Երաժշտասերները կարող են ևս մի քանի երեկո վայելել Հայ կոմպոզիտորական արվեստի 7-րդ փառատոնի շրջանակում:
