Անի Լիպարիտյան, Sputnik.
Sputnik Արմենիա պորտալին տված հարցազրույցում շինարարական կազմակերպություններից մեկի մենեջեր Վլադիմիր Գրիգորյանը պատմեց իր հիվանդության պատմությունը, որը չափազանց զարմանալի է:
«Ամեն ինչ սկսվեց նրանից, որ իմ ինքնազգացողությունը վատացավ. գլխապտույտ, հազ սկսվեց, այնուհետև նաև քունս վատացավ: Մտածեցի, որ պատճառը ծխելն է: Նույնիսկ սկսեցի մտածել ծխելը թողնելու մասին: Ամեն անգամ մրսածության ժամանակ ինձ վատ էի զգում, թոքերս ցավում էին: Իսկ հետո սկսեցին խոսել տարածված խոզի գրիպի մասին: Մայրս գրեթե ստիպեց ինձ բժշկի գնալ», — պատմում է Վլադիմիրը:
Ախտանշանները շատ նման էին խոզի գրիպի ախտանշաններին` բարձր ջերմություն, հազ, մկանացավ: Վլադիմիրը որոշեց, որ իր մոտ խոզի գրիպ է:
«Վերջապես որոշեցի ու գնացի բժշկի: Ինձ զննեցին, հետո ուղարկեցին հետազոտության, արյան ընդհանուր անալիզ հանձնեցի ու նույնիսկ կրծքավանդակի օրգանների ռենտգեն արեցի: Արդյունքը ցնցեց ինձ ու ընտանիքիս անդամներին… Ֆլյուրոգրաֆիայի նկարում սպիտակ հետք էր նկատվում աջ թոքի շրջանում: Մտածեցինք` թոքերի քաղցկեղ է, իսկ դա վերջն է, մահվան դատավճիռ», — խոստովանեց Sputnik Արմենիա պորտալի զրուցակիցը:
Վլադիմիրը հոգեպես ճնշված էր: Այդպես նա մի քանի օր անցկացրեց: Նրան թվում էր, որ հարազատներն ու բարեկամներն իրեն տեսնելիս ամեն անգամ մտքում հրաժեշտ էին տալիս:
Նա գնում է ուռուցքաբանական կլինիկա` համապատասխան մասնագետի խորհրդատվությունը ստանալու: Հերթական հետազոտությունից հետո ուռուցքաբանը Վլադիմիրին հայտնում է, որ թոքերի վրա հայտնաբերված հետքը կյանքին վտանգ չի սպառնում:
Իսկ նրա վատ ինքնազգացողությունը կապված էր հենց դրա հետ:
«Ասացին, որ վիրահատության կարիք կա… Աշխատում էի ինձ առույգ պահել, թեև մտավախություններ ունեի, չէ՞ որ նախկինում երբեք վիրահատության չէի ենթարկվել: Արդյունքում վիրահատեցին: Հիմա կազդուրվում ու վերականգնվում եմ վիրահատությունից հետո: Ինձ բավական լավ եմ զգում: Ստացվում է, որ խոզի գրիպից զգուշանալը փրկեց իմ կյանքը», — ասում է Վլադիմիրը:
Իրականում եթե նա ժամանակին բժշկի չդիմեր, պարզ չէ, թե ինչպես ամեն ինչ կավարտվեր:
Գլխավոր թերապևտ-թոքաբան Անդրանիկ Ոսկանյանը խորհուրդ է տալիս վատ ինքնազգացողության դեպքում անհապաղ դիմել բժշկի, հատկապես գրիպի համաճարակի շրջանում:
«Հարկ չկա խուճապի մատնվել H1N1 (խոզի գրիպ) ենթատեսակի վիրուսի պատճառով, պարզապես պետք է իմանալ` ինչպես պայքարել դրա դեմ: Համաճարակ է հայտարարվում այն դեպքում, երբ ամենաքիչը երկրի բնակչության 5 տոկոսը կոնկրետ հիվանդությամբ է վարակված», — ասաց նա լրագրողներին:
Նրա խոսքով` հիվանդությունն անցնում է մարդուց մյուս մարդուն, իսկ վիրուսը օդում կարող է ապրել մոտ վեց ժամ: Որպեսզի վիրուսը չփոխանցվի օդակաթիլային ճանապարհով, անհրաժեշտ է պրոֆիլակտիկ միջոցների դիմել:
Հիվանդը պետք է պահպանի անկողնային ռեժիմ, նրան անհրաժեշտ է մեկուսացնել տան մյուս անդամներից: Սենյակն անհրաժեշտ է օդափոխել 2-3 անգամ, իսկ բոլոր առարկաները, որոնց հետ շփվել է հիվանդը, պետք է ախտահանել:
Նա նշեց, որ հաճախակի մարդիկ շփոթում են մրսածությունն ու հարբուխը գրիպի հետ: «Հարբուխը հիվանդություն չէ, հարբուխի ժամանակ մարդը փռշտում ու հազում է, սակայն այդ ախտանշանները կարող են ի հայտ գալ նույնիսկ սոխ ուտելուց հետո»:
