ԵՐԵՎԱՆ, 20 հունվարի- Sputnik. Հայաստանը պատրաստ է ստորագրել «Պաշտպանական համակարգեր» ռուս-բելառուսական միջպետական ֆինանսաարդյունաբերական խմբի կազմում հանրապետության ձեռնարկությունների ներառման համաձայնությունը և արձանագրությունը, ասաց պաշտպանության նախարար Սեյրան Օհանյանը:
«Պաշտպանական համակարգեր» միջպետական ֆինանսաարդյունաբերական խումբը ստեղծվել է 2000թ.-ի փետրվարի 11-ին կնքված ռուս-բելառուսական միջպետական համաձայնագրի հիման վրա:
«Նախօրեին միջկառավարական հանձնաժողովի համանախագահների հետ անկեղծ և հանգամանալից զրույց է եղել: Հանձնաժողովի աշխատանքում ունեցած հաջողություններից բացի, նշվել են այն հարցերը, որոնք հատուկ ուշադրության կարիք ունեն»,- պարզաբանեց Օհանյանը՝ ելույթ ունենալով ռազմատեխնիկական համագործակցության վերաբերյալ հայ-ռուսական միջկառավարական հանձնաժողովի 10-րդ նիստում, որն ընթանում է Երևանում հունվարի 18-22-ը:
Նրա խոսքով՝ հայկական կողմն անցկացրել է միջպետական համաձայնության բոլոր ընթացակարգերը և պատրաստ է երկու փաստաթղթերի ստորագրմանը:
«Մենք ինչպես միշտ բաց ենք համագործակցության համար»,- ասաց Օհանյանը:
Հանձնաժողովի աշխատանքի շրջանակում ստորագրվել է համատեղ աշխատանքային խումբ ստեղծելու մասին դրույթ՝ ինտելեկտուալ գործունեության արդյունքների իրավունքների փոխադարձ պաշտպանման մասին:
«Ես ուշադիր հետևում եմ հանձնաժողովի աշխատանքին և կցանկանայի նշել աշխատանքի դրական դինամիկան, ինչպես նաև շնորհակալություն հայտնել ձեզ կատարված աշխատանքի համար, որը նպաստում է մեր բարեկամական պետությունների պաշտպանունակության բարձրացմանը, տարածաշրջանային կայունության և անվտանգության ամրապնդմանը»,- ասաց Օհանյանը:
Պայմանավորվածություններ
Հայաստանի ՊՆ ղեկավարը նշեց, որ հանձնաժողովը համակարգող մարմին է, որը պատասխանատու է պայմանավորվածությունների կատարման համար, որոնք ձեռք են բերվել տարբեր մակարդակներում հայ-ռուսական ռազմատեխնիկական համագործակցության հարցերի շուրջ:
Պաշտպանության նախարարը կարևոր ձեռքբերում համարեց այն, որ ուժի մեջ է մտել Հայաստանի և Ռուսաստանի միջև ռազմատեխնիկական համագործակցության զարգացման մասին երկկողմ պայմանագիրը:
«Ես հրաման եմ ստորագրել պայմանագրի համապատասխան դրույթները պաշտպանության նախարարության և գլխավոր շտաբի ստորաբաժանումների կողմից իրագործելու մասին: Հանձնաժողովի աշխատանքի շրջանակում ստորագրվել է ՌԴ և ՀՀ կառավարությունների միջև համաձայնագրի իրագործման համար համատեղ աշխատանքային խումբ ստեղծելու մասին դրույթն ինտելեկտուալ գործունեության արդյունքների իրավունքների փոխադարձ պաշտպանության մասին, որոնք օգտագործվում են ռազմատեխնիկական համագործակցության ընթացքում»,- ասաց Օհանյանը:
Նախարարն ավելացրեց, որ հանձնաժողովի աշխատանքի շրջանակում ստորագրման է նախապատրաստվել Հայաստանի և ՌԴ կառավարությունների միջև համաձայնության նախագիծը ռազմական նշանակության արտադրանքի նպատակային օգտագործման վրա հսկողություն իրականացնելու կարգի մասին, որն առաքվում է նշված փաստաթղթի շրջանակում:
Ռուսական կողմը
Կոնստանտին Բիրյուլինը՝ ռազմատեխնիկական համագործակցության վերաբերյալ Դաշնային ծառայության ղեկավարի տեղակալը, ռազմատեխնիկական համագործակցության հարցերով հայ-ռուսական միջկառավարական հանձնաժողովի համանախագահը, նշեց, որ շփման երկու օրերի ընթացքում արդեն շատ կարևոր հարցեր են քննարկվել:
«Կարծում եմ՝ մենք ճիշտ որոշում ենք գտել, որն ուղղված է մեր համագործակցության ամրապնդմանը, ինչպես Ռուսաստանի, այնպես էլ Հայաստանի ազգային անվտանգության ամրապնդմանը»,- նշեց Բիրյուլինը:
Նրա խոսքով՝ կողմերը բավական խորը կատարելագործել են իրավանորմատիվ բազան, որը ռուսական կողմի կարծիքով թույլ կտա իրագործել երկու երկրների միասնական պաշտպանական-արդյունաբերական համալիրում ռուսական և հայկական ձեռնարկությունների ինտեգրացման հերթական փուլը:
«Դա հնարավորություն կտա մեր պետություններին ունենալ ոչ միայն ուժեղ, այլ նաև մոբիլ զինված ուժեր, որոնք կարող են լուծել շատ կարևոր առաջադրանքներ՝ ելնելով երկրի անվտանգության և պաշտպանական-արդյունաբերական համալիրի շահերից»,- ասաց նա:
Բիրյուլինը նշեց, որ այդ ուղղությամբ առաջիկայում կկառուցվեն որոշակի պլաններ և համագործակցության ուղղություններ:
«Մեզ մոտ դեռ նոր մտքեր ու գաղափարներ են ծնվում, որոնք կիրագործենք ու կկատարելագործենք»,- ասաց նա:
Ռուսական պատվիրակության կազմում են ընդգրկվել են ՌԴ նախագահի աշխատակազմի, ՊՆ-ի և ԱԳՆ-ի, Հայաստանում ՌԴ դեսպանատան, ռազմատեխնիկական համագործակցության հարցերով Դաշնային ծառայության, ռազմաարդյունաբերական հանձնաժողովի ներկայացուցիչները:
