Դավիթ Գալստյան, Sputnik
Զարգացող դահուկային ֆեդերացիաների դահուկավազքի գավաթի առաջնությունը Ծաղկաձորում էր հավաքել 6 երկրի՝ Հայաստանի, Ռումինիայի, Սերբիայի, Բելառուսի, Լիտվայի և Իրանի շուրջ 50 ներկայացուցչի: Մրցումների երկրորդ օրն ավարտվեց հայ դահուկորդների անվիճելի հաղթանակով: Ինչպես հաղորդեց Հայաստանի Դահուկասպորտի ֆեդերացիայի գլխավոր քարտուղար Գագիկ Սարգսյանը, Դահուկասպորտի միջազգային ֆեդերացիայի հովանու ներքո գործում է Զարգացող դահուկային ֆեդերացիայի խորհուրդը, որի կազմում է ներառված նաև Հայաստանը:
«Այդ խորհուրդը երկար տարիներ շարունակ լեռնադահուկային սպորտի գավաթի առաջնություն է անցկացրել: Դահուկավազքի առաջնությունն առաջին անգամ է անցկացվում, և ի պատիվ ֆեդերացիայի պետք է ասել, որ այդ հնարավորությունը տվեցին մեզ»,- ասաց Սարգսյանը:
Աղջիկները
Ցուրտ էր: Հանդիսատեսը, մարզիչներն ու լրագրողները տաքանալու համար ցատկոտում էին տեղում, հետ ու առաջ էին քայլում մեկնարկային գծի մոտ: Մրցավազքը մեկնարկեց 16-23 տարեկան աղջիկների հինգկիլոմետրանոց տարածությամբ: 2,5կմ երկարությամբ անտառային ուղու մեծ մասը գրեթե չէր երևում, ուստի հանդիսատեսը կարող էր հետևել միայն մեկնարկի ու եզրագծի հատվածներին:
«Կսկսես, երբ ասեմ»,- լսվեց կողքից, երբ առաջին համարի տակ հանդես եկող աղջիկն անհամբեր սպասում էր մեկնարկին: Մեկնարկը հաջող անցավ, աղջիկները սլացան առաջ և որոշ ժամանակ անց սկսեցին մոտենալ վերջնագծին (նրանցից մեկը քիչ մնաց տապալեր մեր լուսանկարչին): Քանի որ նրանք միասին չէին սկսել, հաշվի էր առնվելու լավագույն արդյունքը, ապա հասկանալի չէր, թե ով հաղթեց: Բայց ինչպես պարզվեց, առաջին տեղը զբաղեցրեց Կատյա Գալստյանը, իսկ նրանից հետո եզրագծին էին հասել Ռումինիայի և Սերբիայի մարզուհիները: «Լավ պայքար ստացվեց, սակայն ձյան պատճառով չկարողացա տրամադրվել երթուղուն, բայց միևնույն է հաղթեցի»:
«Ռումինիացի մրցակիցն էլ լավ ելույթ ունեցավ, բայց ամեն դեպքում մրցումն ընթանում էր մեր երկրում, պետք էր բարձր պահել երկրի պատիվը»,- հպարտությամբ ասաց Կատյան:
Նրա մարզիչը՝ Հայաստանի վաստակավոր մարզիչ Սլավիկ Սարգսյանը, միացավ զրույցին և հայտարարեց, որ ռումինացի մարզուհին, ով նախկինում Եվրոպայի առաջնությունում զբաղեցրել է 10-րդ տեղը, շատ ուժեղ է եղել, բայց Կատյան ավելի լավ է ելույթ ունեցել: «Դա մեծ հաղթանակ է Հայաստանի կանանց հավաքականի համար»,- ոգևորված նշեց Սարգսյանը:
Աղջկան մի կողմ տանելով՝ խորհուրդ տվեց նրան համեստություն չանել. «Եթե ավելի ուժեղ ես եղել, այդպես էլ ասա լրագրողներին…»:
Աղջիկների հաջողություններից ոգեշնչված՝ հայ դահուկորդները մարտի նետվեցին: Նրանք արդեն անցնելու էին ոչ թե հինգ, այլ տասը կիլոմետր, ուստի ավելի ուշ վերադարձան: Բայց վերադարձան փայլուն արդյունքով՝ ոսկե և բրոնզե մեդալներով. արծաթը բաժին ընկավ բելառուս եղբայրներին (պարզվեց՝ բելառուսը բարձր կարգի դահուկորդ է միջազգային ասպարեզում ելույթների մեծ և հաջող փորձ ունի): «Հայաստանում առաջին անգամ է նման խոշոր մրցույթ անցկացվում, և շատ կարևոր է նման միջոցառման ժամանակ լավ արդյունք ցույց տալը, առավել ևս, որ ինձ հետ մրցում էին շատ ուժեղ դահուկորդներ Բելառուսից, որոնք բարձր տեղեր են զբաղեցրել միջազգային մրցաշարերում»,- ավելի ուշ խոստովանեց առաջին տեղը զբաղեցրած Սերգեյ Միքայելյանը:
Ծաղկաձորը հիանալի վայր է ձմեռային մարզաձևերի զարգացման համար
Պարգևատրման արարողություններից մեկն անցկացրեց Զարգացող դահուկային ֆեդերացիայի խորհրդի ղեկավար Փոլ Միքաելդիսը: Նրա կարծիքով՝ Հայաստանոււմ դահուկային սպորտը շատ արագ է զարգանում, ինչին ակտիվ նպաստում է Ծաղկաձորի մարզահամալիրը:
«Ծաղկաձորի աշխարհագրական դիրքը նպաստում է այստեղ դահուկային մրցումների անցկացմանը: Մարզիկների համար տեղի պայմանները լավ փորձություն են»,- նշեց Միքաելդիսը: Միաժամանակ նա հավելեց, որ Հայաստանում ձմեռային զոբսաշրջության զարգացմանը զգալիորեն խոչընդոտում են ավիատոմսերի բարձր գները:
Մարզիկների ելույթներին հետևում էր նաև (ինչպես նաև հաղթողներին պարգևատրում) սպորտի և երիտասարդության նախարար Գաբրիել Ղազարյանը: Լրագրողների հետ զրույցում նա կիսվեց երկրում դահուկային սպորտի զարգացման մասին իր պատկերացումներով: «Մենք ակտիվ աշխատանք ենք տանում ոչ միայն այն մարզաձևերի վերածնման համար, որոնք զարգացել են դեռ խորհրդանին տարիներին, այլ նաև նոր ուղղություններ ենք զարգացնում: Նման մարզաձևերից մեկը դահուկայի սպորտն է»,- նշեց Ղազարյանը:
Նրա խոսքով՝ իրենց աշխատանքի նպատակներից մեկը զանգվածային սպորտի տարածումն է, այդ թվում՝ նման միջոցառումմների օգնությամբ, քանի որ մարզիկները մրցումների շրջանակում կիսվում են միմյանց հետ իրենց փորձով և վարպետությամբ: Ոչ պաշտոնական զրույցում նախարարը նոստալգիայով հիշեց այն ժամանակները, երբ ինքն անձամբ հաճույքով դահուկ էր քշում:
Զարգացող դահուկային ֆեդերացիայի կողմից պարգևատրվեց նաև Լիտվան: Հավաքականի մարզիչ Եվգենի Ուշատկինը խոսեց դահուկային մրցուղու և Ծաղկաձորի եղանակային պայմանների մասին:
«Կարծում էի, որ նման եղանակային պայմաններում (քամի և առատ ձյուն) ավելի վատ կլինի: Բայց մրցուղին բավական կոշտ էր: Մեր մարզիկն ընդհանուր հաշվարկում զբաղեցրեց հինգերորդ տեղը և երրորդ տեղը փոքր երկրների շարքում, ինչը նորմալ արդյունք է»,- ասաց Ուշատկինը: Մրցումների բոլոր մասնակիցներն ըստ արժանվույն գնահատեցին Հայաստանի ամենահայտնի ձմեռային հանգստավայրն ու եղանակային պայմանները:
