ԵՐԵՎԱՆ, 25 հունվարի- Sputnik. ՀՀ քաղաքացին փորձել է բանկոմատ գողանալ Պրիմորիեի երկրամասի Արտեմ քաղաքում, հաղորդում է «Պրիմորսկայա գազետան»՝ հղում անելով երկրամասի ՆԳՆ գլխավոր վարչության մամուլի ծառայությանը:
«Ոստիկանության հերթապահ մասը տեղեկություն է ստացել, որ բանկային տերմինալում տեղադրված ահազանգի կոճակը միացել է»,- հայտնում է գերատեսչությունը:
Դեպքի վայր ժամանած իրավապահ ուժերը նկատել են վնասված բանկոմատը: Չարագործը թաքնվել է: Ոստիկանությունը քրեական գործ է հարուցել` գողություն փորձ կատարելու մեղադրանքով: Կասկածյալի անձը պարզել են օպերատիվ-հետախուզական գործողությունների արդյունքում, նա եղել է Հայաստանի 30-ամյա քաղաքացի:
Ոստիկանության բաժնում տղամարդը պատմել է, թե ինչպես է փորձել գողանալ տերմինալը: Կասկածյալի խոսքով՝ նա մոտեցել է բանկոմատին, պողպատե պարանի մի ծայրը փաթաթել է տերմինալի վրա, մյուսն ամրացրել է ավտոմեքենային: Ցանկացել է բանկոմատը պոկել տեղից, որից հետո հանել փողերը:
Նա չի հասցրել ավարտին հասցնել մտահաղացումը. ավտոմեքենան դուրս է եկել ճամփեզր, որից հետո հարվածել է պատնեշին:
«Դատարանը նրան մեղավոր է ճանաչել և մեկ տարի ազատազրկման դատապարտել: Բացի այդ, նա պետք է փոխհատուցի գույքին հասցված վնասը 316 հազար ռուբլու չափով»,- նշել են Պրիմորիեի երկրամասի ՆԳՆ վարչությունում:
