ԵՐԵՎԱՆ, 25 հունվարի- Sputnik. Երկու տարի առաջ անգլիական հակահետախուզությունը հրապարակել է Քիմ Ֆիլբիի արխիվային գործը։ Ֆիլբին, զբաղեցնելով բրիտանական հետախուզության (SIS) կարևորագույն պաշտոններից մեկը, միաժամանակ խորհրդային լրտես է եղել: Այդ մասին «ԱիՖ»-ին է պատմել Պետական անվտանգության կոմիտեի (ՊԱԿ) նախկին աշխատակից, փոխգնդապետ, գրող և հատուկ ծառայությունների պատմաբան Իգոր Ատամանենկոն:
Ֆիլբին աշխարհում միակ մարդն է, ով երկու իրարամերժ պարգև է ստացել մրցակիցներից. 1945թ.-ին՝ Բրիտանական կայսրության շքանշան` անգլիական թագավոր Գեորգ VI-ի ձեռքից, 1947թ.-ին՝ Կարմիր նշանի շքանշան` Ստալինի կարգադրությամբ:
Երկուսն էլ ստացել է հետախուզության մեջ ունեցած ավանդի համար: ՄԻ5-ը (բրիտանական հակահետախուզություն) բազմաթիվ անգամ կասկածել է Ֆիլբիին, բայց նրան պաշտպանել է անձամբ Անգլիայի վարչապետը: Սակայն Ֆիլբիի բնակարանի և անձնական իրերի խուզարկության ժամանակ փորձագետ-արվեստաբանը հայտնաբերել է Ստալինի նվերը` Արարատ լեռան հարթաքանդակը, որը ստեղծվել է լավագույն խորհրդային քանդակագործների և ոսկերիչների կողմից ` դրվագազարդված ոսկով, պլատինով և ադամանդներով:
Անձամբ Ֆիլբին միշտ ասել է, որ հարթաքանդակը գնել է Ստամբուլում: Ուսումնասիրելով «հին իրը»՝ փորձագետը բացահայտել է, որ Ֆիլբին թեև կողմնակի, բայց այնուամենայնիվ որոշակի կապ ունի ԽՍՀՄ-ի հետ. նկարի վրա Արարատ լեռան երկու գագաթն այնպես են պատկերված եղել, որ լեռն այդ դիրքից ոչ մի կերպ չի կարելի տեսնել Թուրքիայի տարածքից։
