ԵՐԵՎԱՆ, 26 հունվարի- Sputnik. Ռուսաստանը Լեռնային Ղարաբաղի հակամարտության կարգավորման սկզբունքների մասին ինչ-որ նոր փաստաթղթեր ընդունելու նախաձեռնությամբ հանդես չի եկել, ռուսական արտաքին քաղաքականության արդյունքներին նվիրված ասուլիսի ժամանակ հայտարարել է ՌԴ ԱԳՆ ղեկավար Սերգեյ Լավրովը, հաղորդում է ՌԻԱ Նովոստին:
««Լավրովի կամ ինչ-որ մեկի փաստաթուղթ» գոյություն չունի»,- ասել է Լավրովը ի պատասխան այն հարցին, թե ինչպես կմեկնաբանի խաղաղ բանակցությունների շրջանակում «Լավրովի փաստաթղթի կամ առաջարկի» հայտնվելու մասին հաղորդագրությունները:
Նախարարն ընդգծել է, որ ղարաբաղյան հակամարտության կարգավորման շրջանակում կա ընդամենը մի քանի փաստաթուղթ։
«Կան մի շարք փաստաթղթեր, դրանք հինգն են կամ վեցը, որոնք ԵԱՀԿ Մինսկի խմբի համանախագահները պատրաստել են ղարաբաղյան կարգավորման տարբեր փուլերում, երբ խոսքը գնացել է այն մասին, որպեսզի որպես առաջին քայլ նախապատրաստել հակամարտության կարգավորման հիմնական սկզբունքները, իսկ արդեն հետո այդ սկզբունքների հիման վրա պատրաստել խաղաղ համաձայնություն, որը կունենար իրավաբանորեն պարտավորեցնող, այլ ոչ թե քաղաքական բնույթ»,- պարզաբանել է Լավրովը։
Նախարարը հիշեցրել է, որ վերջերս հակամարտության կարգավորման մեջ որոշակի դադարից հետո կողմերը վերսկսել են հանգուցալուծմանն ուղղված դիվանագիտական կապերը։
«Նման հանգուցալուծումներն այժմ որոնվում են գաղափարների, բարձրաձայն դատողությունների մակարդակով։ Տեղի են ունեցել մի քանի հանդիպումներ իմ հայ և ադրբեջանցի գործընկերների հետ։ Մենք այդ ամենը քննարկում ենք նաև ԱՄՆ-ի և Ֆրանսիայի համանախագահների հետ։ ԵԱՀԿ-ում առկա փաստաթղթերից բացի, ուրիշ ոչ մի փաստաթուղթ գոյություն չունի»,- ընդգծել է Լավրովը։
