ԵՐԵՎԱՆ, 27 հունվարի — Sputnik. Սուր վարակիչ հիվանդությունների սրընթաց աճն անհանգստացրեց փոքրիկ Անահիտի մորը: Նա գիտեր, որ երեխան կեղծ կրուպ ունի, և գրիպով վարակվելը հավելյալ բարդություններ կառաջացնի նրա մոտ: Ուստի անհապաղ երեխային տարավ տեղամասային պոլիկլինիկա և պատվաստեց գրիպի դեմ, բայց մի քիչ ուշացրել էր. 3-ամյա Անահիտն արդեն վարակվել էր «խոզի գրիպով»:
«Ես գիտեմ, որ պատվաստումից հետո օրգանիզմում համապատասխան իմունիտետ զարգանալու համար հարկավոր է մոտավորապես 10 օր: Փոքրիկս վարակվեց ավելի շուտ, քան օրգանիզմում հասցրել էր իմունիտետ զարգանալ»,-պատմեց Անահիտի մայրը՝ Արմինեն:
Հիվանդության ախտանշանները հայտնվելուն պես փոքրիկի ջերմությունը հասել էր 40 աստիճանի: Կեղծ կրուպն ավելի էր սրվել:
Sputnik Արմենիան մասնագետից հետաքրքրվեց, թե խրոնիկ հիվանդության դեպքում գրիպն ինչ բարդություններ կարող է առաջացնել:
«Խրոնիկ հիվանդություն ունեցող երեխան ավելի խոցելի է դառնում և արագ վերցնում վիրուսը: Նման երեխայի մոտ հիվանդության բարդացումներն ավելի ակնառու են դառնում: Տվյալ դեպքում երեխայի մոտ կարող էր առաջանալ նաև թոքաբորբ: Սակայն պետք է ուշադրություն դարձնել մի կարևոր հանգամանքի վրա՝ երեխան պատվաստվել է»,- ասաց ԱՆ իմունականխարգելման ծրագրի ղեկավար Գայանե Սահակյանը:
Մասնագետի խոսքով՝ գրիպի դեմ պատվաստվելը 50 տոկոսով ապահովագրում է մարդուն հիվանդանալուց: Սակայն եթե անգամ նա հիվանդանում է, ավելի թեթև է տանում հիվանդությունը: Դա է պատճառը, որ փոքրիկ Անահիտի մոտ թոքաբորբ չի առաջացել:
Չնայած երեխան հոսպիտալացվել է ծանր վիճակում, բայց հաղթահարել է «խոզի գրիպը»: Այսօր նա վերականգնվում է:
Նշենք, որ վերջին օրերին հանրապետությունում իրականացված սուր շնչառական վարակների մշտադիտարկումը ցույց է տալիս, որ գրիպը Հայաստանից նահանջում է, իրավիճակը կայուն է: Այսպես` հունվարի 26-ի դրությամբ հանրապետության հիվանդանոցներից սուր շնչառական վարակներից և թոքաբորբերից ապաքինմամբ դուրս է գրվել 216 մարդ։ Նրանցից 131-ն ընդունվել էր սուր շնչառական վարակով, որոնցից 96-ը` մինչև 18 տարեկան, իսկ 85-ը` թոքաբորբով, որոնցից 37-ը` մինչև 18 տարեկան։
Կանխարգելիչ և բուժական գործողությունները շարունակվում են: Ձեռնարկված կանխարգելիչ միջոցառումների, ինչպես նաև բնակչության շրջանում իրազեկվածության բարձրացման արդյունքում հանրապետությունում դիտվում է ստացիոնար կազմակերպություններ սուր շնչառական վարակներով և թոքաբորբերով հոսպիտալացման կայուն իրավիճակ, բարդացած դեպքերի, ամբուլատոր պոլիկլինիկական կազմակերպություններ դիմելիության և շտապ օգնության կանչերի նկատելի նվազում:
