ԵՐԵՎԱՆ, 29 հունվարի- Sputnik. Հայաստանի հավաքականի և «Բեշիկթաշ» ֆուտբոլային ակումբի կիսապաշտպան Արաս Օզբիլիսն առաջին մարզումն է անցկացրել Մադրիդի «Ռայո Վալյեկանո» ակումբում, գրում է իսպանական AS հրատարակությունը։
Օզբիլիսն այս տարվա հունվարին Մոսկվայի «Սպարտակից» տեղափոխվել է Ստամբուլի «Բեշիկթաշ»։ Թուրքական ակումբը խաղացողի համար վճարել է 1,3 մլն եվրո։ Իսկ իսպանական ակումբում կես տարվա վարձակալության համար 25-ամյա ֆուտբոլիստը կվաստակի 300 հազար եվրո։
«Ես եկել եմ «Ռայո Վալյեկանո»` խաղային փորձ ձեռք բերելու համար, որպեսզի ամռանն ավելի ուժեղ խաղացող դառնամ»,- Օզբիլիսի խոսքերը մեջբերում է De Telegraaf-ը։
Հայաստանի հավաքականի կիսապաշտպան Արաս Օզբիլիսի տեղափոխությունը Մոսկվայի «Սպարտակից» թուրքական «Բեշիկթաշ» ակտիվ քննարկումներ է առաջացրել հայկական և ռուսական ֆուտբոլային հանրության շրջանակում։ Մասնավորապես նրա նախկին գործակալ Դմիտրի Սելյուկը վիրավորական ձևով է արտահայտվել Օզբիլիսի մասին` նշելով, որ Հայաստանի կամ Հոլանդիայի հավաքականների միջև ընտրություն կատարելիս Արաս Օզբիլիսը ղեկավարվել է «Երևանից ստացված գայթակղիչ առաջարկով»։
