ԵՐԵՎԱՆ, 31 հունվարի, — Sputnik. Անցած ցրտերի պատճառով գյուղատնտեսության հետ կապված որևէ խնդիր Հայաստանում չկան, խնդիրներ կարող են լինել միայն չթաղված խաղողի այգիների պարագայում, բայց հիմնականում երկրում այգեթաղն արված է, նշեց Ագրարագյուղացիական միավորման նախագահ Հրաչ Բերբերյանը։
Ավելին, նրա խոսքով, շատ դրական վիճակ է ստեղծվել ջրի կուտակման հետ կապված։
«Բավականաչափ ձյուն է կուտակվել սարերում, և կարծում եմ` այս տարի ոռոգման խնդիր չենք ունենա, ջրամբարները լիքը կլինեն։ Այնպես որ եթե ոռոգման համակարգի մասնագետնեը բարեխիղճ վերաբերվան ձնհալի ժամանակ ջրի կուտակմանը, ապա ամեն ինչ լավ կլինի։ Հիմնական վիճակը բարենպաստ է»,- նշեց Բերբերյանը։
Հիմնականում ցուրտ եղանակ է դիտվել Վարդենիսում, Շիրակում, այն վայրերում, որտեղ կարտոֆիլ ու ցորեն են աճեցնում, որոնք ցրտադիմացկուն են։ Նա նշեց, որ Շիրակում ու Վարդենիսում 25 աստիճանը սովորական ցուրտ է, մարդիկ պատրաստ են իրենց ապրանքը պաշտպանել, կան ֆերմերներ, որոնք եռապատ պահեստներ ունեն, որտեղ մթերքը կարող է դիմանալ անգամ 40 աստիճան ցրտին։
