ԵՐԵՎԱՆ, 2 փետրվարի —Sputnik. Էքսկուրսիայի ընթացքում անսպասելիորեն «կատաղած» փիղը ոտքերով տրորել է շոտլանդացի զբոսաշրջիկին, ժանիքներով սպանել նրան և լուրջ վնասվածքներ հասցրել ուղեկցորդին, հայտնում է ՌԻԱ Նովոստին` հղում անելով Phuket News կայքին։
Դեպքը տեղի է ունեցել Սամուի կղզում, Շոտլանդիայի 36-ամյա բնակիչն իր 16-ամյա դստեր հետ է եղել։
Գոլֆ անունով փիղը դեպքից առաջ փորձել է չհնազանդվել իր հետ աշխատող տղամարդուն։ Նա էլ փղին հնազանդեցնելու համար գործի է դրել սուր կեռը, որը կարողանում է ծակել կենդանու հաստ կաշին։ Փիղը սկզբում «խելոքացել» է, սակայն երբ տղամարդը իջել է նրա վրայից, որպեսզի լուսանկարի կենդանու վրա նստած զբոսաշրջիկներին, փիղը գազազել է և սկսել ժանիքներով հարվածել տղամարդուն։
Երբ զբոսաշրջիկներն ընկել են գետնին, փիղը հարվածել է նաև հաշմանդամ զբոսաշրջիկին, որը չի կարողացել փախչել կենդանուց և, մահացու վնասվածքներ ստանալով, մահացել է։
