ԵՐԵՎԱՆ, 2 փետրվարի-Sputnik. Հայաստանն ամեն ջանք գործադրում է ՀԱՊԿ-ն կատարելագործելու ուղղությամբ, ասաց ՀՀ ԱԳ նախարար Էդվարդ Նալբանդյանը։
ՀԱՊԿ-ի վերջին գագաթնաժողովին ՀՀ նախագահ Սերժ Սարգսյանը հանդես եկավ բավական սուր ելույթով և մատնանշեց այն կետերերը, որոնք շտկման կարիք ունեն։ Հայաստանը ՀԱՊԿ-ում նախագահության շրջանակում ի՞նչ քայլեր է ձեռնարկում այս ուղղությամբ,- հարցրեց Sputnik Արմենիայի թղթակիցը
«Մենք ամեն ինչ անում ենք, որպեսզի կատարելագործենք կառույցը, Հայաստանը միշտ նախաձեռնողական և ակտիվ է եղել ՀԱՊԿ-ի աշխատանքներում, միշտ փորձել ենք մեր նպաստը բերել կառույցի առավել արդյունավետ դարձնելու գործում։ Բայց դա մեկ նախագահության խնդիր չէ, այլ` շարունակական գործընթաց։ Որպես նախագահող` մենք ավելի պատասխանատու ենք մոտենում այս աշխատանքին, բայց դա մեկ երկրի հարց չէ»,- ասաց Նալբանդյանը։
Ըստ արտգործնախարարի` արտաքին քաղաքականության համադրության իմաստով պահանջվում է հետևողական աշխատանք բոլոր երկրների կողմից։
«Մենք այդ հարցում շարունակելու ենք լինել ակտիվ և նախաձեռնող».- շեշտեց Նալբանդյանը։
ՀԱՊԿ նախագահությունը Հայաստանին է փոխանցել 2015 թվականի սեպտեմբերին։
ՀԱՊԿ-ն ստեղծվել է 2002թ.-ին, և այժմ կազմակերպության կազմում վեց պետություն է ընդգրկված`Հայաստանը, Բելառուսը, Ղազախստանը, Ղրղըզստանը, Ռուսաստանը և Տաջիկստանը։ Նախկինում կազմակերպության անդամ է եղել նաև Ուզբեկստանը, բայց 2012թ.-ից նա այլևս կազմակերպության մեջ չի մտնում։ ՀԱՊԿ-ի անդամակցությունը Հայաստանի անվտանգության ապահովման բաղադրիչներից է, որն իրագործվում է անդամ պետությունների միջև բազմակողմ կապերի շնորհիվ։
