ԵՐԵՎԱՆ, 6 փետրվարի — Sputnik. Դպրոցների վարկանիշավորման աղյուսակի առաջատար եռյակում են Երևանի «Մխիթար Սեբաստացի» կրթահամալիր հիմնական դպրոցը, Գյումրու Բայրոնի անվան թիվ 20 հիմնական դպրոցը և Երևանի Մ. Մանուշյանի անվան թիվ 48 հիմնական դպրոցը:
ԿԳ նախարար Արմեն Աշոտյանը վարկանիշավորման աղյուսակը հրապարակելուց հետո նշեց, որ արդյունքները կարևոր են դպրոցների տնօրենների և մանկավարժների համար, որպեսզի կարողանան հասկանալ, թե որտեղ է դպրոցի խնդիրը, որտեղ է առավելությունը:
«Այն կարևոր է նաև նախարարության համար, որպեսզի խրախուսի լավագույններին: Վարկանիշավորումը թույլ է տալիս գտնելու, թիրախավորելու մեր աջակցության կարիքն ունեցող դպրոցներին»,- ասաց Արմեն Աշոտյանը:
Նախարարը վարկանիշից դժգոհ մնացածներին խնդրեց դժգոհել հենց իրենց աշխատանքից, հասկանալ, թե որ ցուցանիշով են հետ ընկել:
Հիմք ընդունելով ՀՀ հանրակրթական համակարգի կառուցվածքը և համակազմի 2014-2015 ուստարվա վիճակագրական տվյալները՝ դպրոցները խմբերի են բաժանվել հետևյալ չափանիշներով՝ ըստ կազմակերպաիրավական ձևի և ենթակայության՝ պետական և ոչ պետական, ըստ աշխարհագրական դիրքի կամ տեղակայման՝ քաղաքային և գյուղական, ըստ կրթական ծրագրերի աստիճանի՝ տարրական, հիմնական, միջնակարգ և ավագ, վարժարան, ըստ սովորողների թվի՝ մեծ, միջին և փոքր:
