ԵՐԵՎԱՆ, 15 փետրվարի — Sputnik. Մոսկվան Իրանին կմատակարարի С-300 ԶՀՀ, հայտնում է ՌԻԱ Նովոստին` հղում անելով ՌԴ նախագահի Աֆղանստանի հարցերով հատուկ ներկայացուցիչ, ՌԴ ԱԳՆ Ասիայի երկրորդ դեպարտամենտի ղեկավար Զամիր Կաբուլովին։ «Մատակարարումը կսկսվի ամենամոտ ժամանակներում», — հայտնել է Կաբուլովը։
Ավելի վաղ Իրանի պաշտպանության նախարար Հոսեյն Դեհգանը հայտնել էր, որ ռուսական С-300 համալիրի առաջին խմբաքանակի մատակարարումն իրականացվելու է 2016 թվականի առաջին եռամսյակում։
Ռուսաստանն ու Իրանը 2007 թվականին շուրջ 900 մլն դոլար արժողությամբ С-300-ի մատակարարման մասին պայմանագիր են ստորագրել։ ՌԴ նախագահ Վլադիմիր Պուտինը 2015 թվականի ապրիլին հրաման է ստորագրել, որը հանում է Իրան այդ համալիրների մատակարարման արգելքը։ Հունիսին նախագահի ռազմատեխնիկական համագործակցության հարցերի օգնական Վլադիմիր Կոժինը հայտնել էր, որ Մոսկվան ու Թեհրանը նախապատրաստում են С-300 մատակարարման պայմանագիրը։ Ընդ որում նա ընդգծեց, որ С-300 համակարգերը փոփոխություններ են կրել, բարելավել են տակտիկա-տեխնիկական բնութագրերը։
