ԵՐԵՎԱՆ, 15 փետրվարի-Sputnik. Առողջապահության նախարարությունը շարունակում է Զիկա տենդի տարածման ու կանխարգելման աշխատանքները։ Որոշ հրապարակումների համաձայն` Զիկա վիրուսի վարակման մեկ դեպք է գրանցվել նաև Ռուսաստանում։
Նկատի ունենալով Զիկա տենդի համաճարակային լարված իրավիճակն աշխարհում, ՀՀ ազգաբնակչության շրջանում հիվանդության կանխարգելման նպատակով Առողջապահության նախարարի հրամանով հաստատվել է «Զիկա» տենդի համաճարակաբանության, ծագումնաբանության, դեպքի ստանդարտ բնորոշման, բուժման, կանխարգելման» մեթոդական ուղեցույցը, «Նախազգուշացում զբոսաշրջիկներին՝ «Զիկա» տենդից խուսափելու համար» վերտառությամբ պաստառը, ինչպես նաև հանձնարարվել է ՀՀ պետական սահմանի անցակետերում ուժեղացնել սանիտարակարանտինային հսկողությունը «Զիկա» տենդի կասկածով հիվանդների հայտնաբերման համար:
«Զիկա» տենդը «Զիկա» վիրուսով հարուցված միջին ծանրության հիվանդություն է, տարածված է արևադարձային և մերձարևադարձային երկրներում, քանի որ հիմնականում փոխանցվում է այդ կլիմայական գոտիներում տարածված Aedes aegypti մոծակի միջոցով, նաև սեռական ճանապարհով:
«Զիկա» վիրուսի դեմ կանխարգելիչ պատվաստանյութ դեռևս չի ստեղծվել: Հղի կանանց, ինչպես նաև նրանց, ովքեր պլանավորում են հղիանալ, խորհուրդ է տրվում խուսափել «Զիկա» վիրուսի տարածման երկրներ այցելելուց:
